Thursday, March 01, 2007

نتيجة التصويت


مش عارف النتيجه دي محبطه و لا متوقعه و لا ايه
بس من شروط التصويتات ان العينه تكون عشوائيه
و طبعا ده مش موجود هنا
الشريحه العمريه تقريبا واحده
و الخلفيه الثقافيه متقاربه الي حد ما
انا شايف كده التصويت ده لو اتعمل في الشارع
وسط الناس بجد
النتيجه هتكون مأساه
--------
علي العموم انا مش هشيل التصويت دلوقتي
هسيبه شويه يمكن النتيجه تتحسن عن كده
********************
Utopian

posted by Utopian @ Thursday, March 01, 2007  

43 Comments:

  • At Thursday, March 01, 2007 1:52:00 PM, Blogger smraa alnil said…

    هيييييييييييييه
    اول كومنت
    انا معاك برضه ان لو التصويت دة اتعمل في الشارع فعلا النتيجة هتبقي مأساه
    ربنا يسترها بقي

    تفتكر بقي الناس اللي صوتت وقالت ان ليها هدف في حياتها ايه هو هدفها
    هل هو جمع المال ولا الجواز ولا لالا
    ايه بالظبط
    انا عن نفسي احبطت لما شفت التصويت دة
    ربنا معانا يارب

     

  • At Thursday, March 01, 2007 3:41:00 PM, Blogger Unknown said…

    ايه ده ؟
    أنا ما شاركتش في التصويت ليه ؟
    .....
    بس بعد النتيجة دي أكيد مش ها أصوّت
    علشان هيه محبطة بما فيه الكفاية
    .......
    معهلش يا مصر
    انتي شخصياً معملتيش حاجة في حد
    بس تقريباً هوه ده العشق اللي زي الداء
    ......
    انت ازيّك يا عمرو ؟

     

  • At Thursday, March 01, 2007 3:50:00 PM, Blogger ibn nasser - ابن ناصر said…

    انت ممكن تقوول ان النتيجه دي ممتازه عشان لو اتعمل في الشارع بجد هتبقي نتيجه كارثيه بجد

     

  • At Thursday, March 01, 2007 3:50:00 PM, Blogger Utopian said…

    انجي

    واللهي منا عارف بأه
    بس مش متفائل اوي بالاهداف بصراحه

    امين يا رب

    اللهم اهدنا و اهد بنا

     

  • At Thursday, March 01, 2007 3:53:00 PM, Blogger Utopian said…

    اميره

    ماهو قدامك بقالوا بتاع شهر و اكتر يا اميره
    علي الاقل كنتي حسنتي النتيجه شويه

    مصر دي و النبي صعبانه عليا اوي
    عماله تتسرق و تتنهب و تتشتم
    وبس

    سيبك انتي
    انا تمام الحمد لله
    يا رب يكون مزاجك تمام

     

  • At Thursday, March 01, 2007 3:54:00 PM, Blogger Utopian said…

    ابن ناصر

    ده أكييييييييد

     

  • At Thursday, March 01, 2007 6:31:00 PM, Blogger Unknown said…

    انتي فاهمني غلط يا عمرو
    أنا عمري ما كنت ها أحسّن النتيجة
    بيني وبينك بقى
    أنا مكسوفة من نفسي لأني مابعملش حاجة غير اني أراهن على القدر وحاجت زي
    كل من عليها فان
    ولكل أجل كتاب
    الكلام ده يعني
    يمكن أكون بحب البلد دي وصعبانة عليا زيّك
    بس بصراحة ما بعملش حاجة
    يمكن مابحبهاش كفاية
    يمكن مستخسرة فيها الحب
    الله أعلم

     

  • At Thursday, March 01, 2007 8:49:00 PM, Blogger Utopian said…

    اميره

    ممممممم

    انتي ادري بنفسك طبعا

    مش عارف اقوللك ايه
    !!!

     

  • At Thursday, March 01, 2007 8:57:00 PM, Blogger بنت مصر said…

    السلام عليكم
    فكرة التصويت ده ظريفه جدا وكالعاده موضوعه مصر
    بس سؤااال؟؟؟
    هو انت متأكد انك ماكنتش عارف النتيجه قبل ما تشوفها وان النسبه اللي مش بطاله اللي بتحب
    مصر معظمها مش بيحاول يعملها حاجه وكأن بلدنااصبحت تراب بندوس عليه واسم بنهتف بيه في الاغاني وصورة كل يوم نتفرج عليها ونتحسر على بختنا وبخت بلدنا بينا ونضرب كف على كف!!! وبس

     

  • At Thursday, March 01, 2007 9:15:00 PM, Blogger Unknown said…

    This comment has been removed by the author.

     

  • At Thursday, March 01, 2007 9:19:00 PM, Blogger Unknown said…

    يا لهوييييييييي

    انت فهمت ايه يا عمرو ؟
    بضهر ايدك كده ؟
    ماشي
    .....
    على العموم
    أنا ها أفضل مصرّة على ان اللي مابيعملش حاجة غير انه يكون موظف على حد تعبيرك انت
    صعب يقول على نفسه انه بيحب مصر
    علشان هوه بياخد مرتب على وظيفته
    بالمعنى المباشر و المعنى الغير مباشر
    ما ينفعش أكون باتصرف على حسب أصل الأشياء وأقول اني باعمل كده علشان خاطر بلدي
    ما ينفعش أبطّل أرمي الزبالة في الشارع وأقول علشان خاطر مصر
    ما ينفعش أتبرع بالدم وأقول ده علشان بحب مصر
    لا يا عمرو
    كل ده وغيره كتير أنا باعتبره الأصل في الأشياء
    وعلشان أقدر أقول بعين قوية
    أنا باحب بلدي
    لازم أكون باعمل حاجات تانية كتيرة قوي غير اللي أنا قلتها
    وأنا حاليا ما باعملش غير برضه الأصل في الأشياء
    في الأنسانية يعني
    .........
    صنفني زي ما انت عايز بقى
    ......
    سلااااااام

     

  • At Thursday, March 01, 2007 9:20:00 PM, Blogger Utopian said…

    وعليكم السلام

    انا عارف النتيجه اللي في الشارع
    عارفها كويس
    بس الفكره اني كنت فاكر ان الموضوع هيبقي مختلف شويه هنا
    قصدي ان الخلفيه الثقافيه للناس اللي عندها مدونات و بتتابع
    كنت بستني بيها نتيجه افضل
    بس ده دليل برضه ان الناس جاوبت بصدق
    و ده في حد ذاته شيء كويس

    دي المشكله فعلا
    دلوقتي كله بيبص للبلد اكنها
    جثه و بتفرفر
    ومحدش بيعمل حاجه
    نفس الطريق المصريه اياها
    لما تحصل حادثه
    وتلاقي حد متكوم علي الارض
    تلاقي كل الناس و اقفه
    و بتقول
    لا حول ولا قوة الا بالله
    و بتضرب كف بكف
    بس هما من جواهم مش فاهمين يعني ايه
    لا حول ولا قوة الا بالله
    !!!!!

     

  • At Thursday, March 01, 2007 9:31:00 PM, Blogger Utopian said…

    اميره

    انتي اللي فهمتي ايه بس
    مش قصدي حاجه و اللهي
    بس انا بجد مكنتش عارف اقوللك ايه
    لان كلامك صح و مفيهوش مغالاه
    و مش عايز اكون الملاك
    اللي بيدي للناس محاضرات في حب البلد
    و من جوايه ممكن احس ولو للحظه اني منافق
    لاني بتكلم اكتر ما بعمل!!

    اكيد الحب مش بالكلام
    بس مش معني اني مش بعمل يبقي مبحبهاش

    موضوع اصل الاشياء اللي بتتكلمي فيه ده لفت نظري لحاجه
    يعني لو عملنا الاستفتاء ده في اي بلد
    متوقعه النتيجه هتبقي عامله ازاي؟
    بره الدنيا نضيفه و المفروض ان محدش بيرمي حاجه في الشارع
    بس عشان فيه قانون
    مش موضوع حب زي مانتي قلتي

    -------
    حاسس اني بلف و مش عارف اقول حاجه
    بصي يا اميره
    الحاجه اللي بجد مقتنع بيها
    ان مصر لازم تبقي احسن من كده
    لان كده وحش اوي
    و متأكد برضه اني مش عايز كمان
    10 سنين من دلوقتي -ان شاء الله- ابقي مجرد رب اسره
    بيروح الصبح الشغل
    و يرجع بالليل ينام
    و شكرا علي كده
    محتاج اعمل حاجه ارضي بيها ربنا
    و ارضي نفسي عن نفسي

     

  • At Thursday, March 01, 2007 9:41:00 PM, Blogger بنت مصر said…

    بالمناسبة انا من مده قصيرة جدا شفت ناس في الشارع بيهتموا بالزرع وبيصلحوا شكله وكانوا لابسين يونيفورم بس اللي حسيته انهم بيعملوا كده من نفسهم او بأه يمكن كنت عايزة احس بكده بس فعلا حسيت بفرحه غريبه دي الدنيا لسه بخير ولسه في ناس بتخاف على الزرع والخضرة وبترعاها واللوحه اللي ناس شايفاها سوده ناس شايفاها خضراء
    وبالنسبه للأصل في الاشياء فمش كل اللي بياخدوا مرتبات بيشتغلوا بضمير ومش كل اللي بيحافظ على نظافه بلده بيكون ده نابع من حبه لبلده فعلا مش خايف على منظرة مثلا :) ومش كل اللي بيعمل عمره لعربيته بيكون علشان خايف على بلده من التلوث مش خايف لحسن يقع في ايد ضابط ابن حلال ياخده مخالفه علشان عربيته غير مطابقه للمواصفات ولا علشان عايز يبيعها او تعمر معاه شويه
    بس ارجع واقول....
    بجد رائحه الورد موجودة بس الانوف لا تشم!!!

     

  • At Thursday, March 01, 2007 9:58:00 PM, Blogger Unknown said…

    أيوة كده
    باحسب
    أصل أختك قمّاصة قوي
    ما علينا
    .....
    بص يا عمرو
    المناقشات دي خدت مني وقت طويل قوي
    يعني زي ما انت بتقول
    برة فيه قانون بيمنع الناس ترمي زبالة في الشارع
    احنا ليه ماعندناش؟؟
    علشان الناس هاتخالف القانون ومش هيدفعوا الغرامة وطبعاً احنا ما عندناش أقسام بوليس كفاية علشان تكفي بس الناس اللي بتخالف قانون النضافة
    تعالى بقى للناس اللي معاها فلوس وهاتدفع الغرامة
    بيحصل الآتي
    ييجي الراجل اللي بيحصّل الغرامات
    وبدال ما ياخد من مرتكب المخالفة عشرة جنيه للحكومة
    يآخد خمسة بس يحطّها في جيبه ويطرمخ على الموضوع
    زي أمناء المرور بالظبط بالنسبة لركن العربيات
    هتعمل ايه في دول
    المشكلة ان الناس بتقولك هيه دي سرقة ؟؟
    لأ .. الضرورات تبيح المحظورات
    يعني الفقر يبيح الرشوة
    والتستر على الخطأ
    ......
    برة مفيش قوانين وبس
    برة فيه كمان رقابة على تنفيذ القوانين دي
    واحنا بقى النائب العام عندنا ايدك منه والأرض
    هتجيب مين يراقب ؟؟؟
    .....
    أوعى تقولي ربنا
    علشان ربنا قال
    وأطيعوا الله وأطيعوا الرسول وأولي الأمر منكم
    .....
    أولي الأمر منّا همّا السبب في اللي احنا فيه
    بس ها تقدر تعترض ؟؟
    .......
    ايه الرغي ده ؟؟؟
    يا عم كنت سيبتني مقموصة أحسن
    ......
    انت غيّرت اللون ولا الكمبيوتر عندي باظ تاني ؟؟؟
    .......
    سلامات بدون رقابة

     

  • At Thursday, March 01, 2007 10:04:00 PM, Blogger بنت مصر said…

    تكمله..
    الانوف اخدت على دخان العربيات ورائحه التلوث ونسيت رائحه الورد فبطلت تزرعه والعيون اخدت على منظر الزباله ونسيت شكل النظافه فبطلوا ينظفوا!! وبس

     

  • At Thursday, March 01, 2007 11:07:00 PM, Blogger Yasmine Adel Fouad said…

    مممممممممممممم


    عمرو بيه
    " الالقاب محفوظة لا تقلق سيدى "


    جاية متأخرة
    بس مفيش مشكلة
    انا بقى مستغرباكم كلكم
    انا شايفه ان النتيجة متفائلة بزيادة
    معلش يا عمرو لو احبطتك
    و الله انا جاوبت كل الاجابات بنت الناس الكويسة
    بس استغربت ان معظم اللى دخلوا جاوبوها
    مش علشان انا اوعى بنت البلد دى
    و الباقيين خونة
    بس علشان لو كل الناس الحلوة بتحب مصر ام الخير يبقى مصر بتقع ليه يا بشر
    هنقول ان محدش من مصلحتة يفبرك التصويت
    و ان مفيش لعب فى النتيجة
    خصوصا ان عمرو فوق مستوى الشبهات
    ما هو اللى على على بقى :)
    بس انا شايفه ان لو الناس اللى فى الشارع الفل قالوا رأيهم
    النتيجة هتبقى مسخرة مش مأساة
    مسخرة علشان دى تنفع قصة شعب
    مش عارفه ليه افتكرت برنامج العسيلى اللى بييجى على
    otv
    مش انا وصلتلها يا عمرو
    :)
    المهم كان فى فقرة من البرنامج اسمها العسيلى فى الشارع
    كنبه و فى الشارع و بيسأل ناس سؤالين
    ايه اكتر حاجه بتحبها فى شعب مصر و ايه اكتر حاجه ما بتحبهاش
    اقسم بالله العظيم بقالى سنين ماضحكتش من قلبى كده
    بجد اجابات مسخرة
    و المصحف الشعب ده يا اهبل يا بيستهبل
    يا مينفعش كده
    المهم هقولك كام اجابه
    واحد بتاع امن قالك اكتر حاجه بحبها فى المصريين الطيبه و الجدعنه و اوحش حاجه فيهم انهم بيعملوا فى بعض خوازيق و مش بيحبوا بعض
    و الله انا كانت هتيجلى سكتة قلبية من الضحك
    كان فى بقى سؤال كمان ايه الحاجه اللى مش عاجباك فى مصر
    النتيجة بقى كانت معظمها
    مفيش حاجه مصر كل حاجه فيها اوعى
    طبعا العسيلى بقى كان بيقولهم و الله
    انتو شايفين كده
    جابولوه الضغط يا عين امه بقى

    المهم انت روحك الوطنيه شبه روح العسيلى
    ربنا يباركلكم فيها

    سيبك بقى من انى عماله ارغى و قارفاك
    القضية انى مش قاصده احبطك
    انا شايفه ان النتيجى دى معناها فى امل يا رجاله
    و النتيجى الحقيقية اللى هتحبطك لما تنزل ارض الوطن العزيز

    بص بقى انا شايفه الحل السليم دلوقتى
    ان كل واحد يشتغل على نفسه بضمير و لما يبقى تمام اوى و اد المسئولية يبدا ينشر الدعوة لحب الوطن

    :)


    يالهوى ع الرغى
    انا هنزل الرد ده
    و لو لقيت انه مفيهوش حاجه مفيده هضطر انزل واحد غيره
    معلش بقى
    زى بيتى برضه

     

  • At Thursday, March 01, 2007 11:17:00 PM, Blogger Yasmine Adel Fouad said…

    عمرو

    حصل موقف النهاردة فكرنى بيك
    الصراحه بقيت كل ما اشوف زبالة فى الشارع افتكرك

    :)

    شوف قلة الذوق يا جدع
    بس الارتباط الشرطى ده معايا و مش عارفه اتصرف فيه الصراحه

    المهم يافندم
    شوفت النهاردة واحد بيرمى قشرة موز فى الشارع
    هوبا قلت اوعى انا هروح اعمل فيها وزيرة الزبالة قصدى النضافه
    بس لسه كنت هقوله ليه كده ياكابتن مش بلدك دى ولامؤاخذة
    لقيت فى الارض قشر برتقال قلت لا الراجل يقولى يعنى انا اللى رميت لوحدى
    فقررت اشجع نفسى شويه و اتكلم المرة الجاية
    هو فى اكتر من اللى بيرموا زبالة فى الشارع

    انا بقترح مشروع يكسب دهب
    نصنع شنط بنت ناس كده
    علشان الاولاد اللى حجتهم مش معاهم شنط
    يبقى معاهم و يرموا فيها الزبالة

    هنكسب دهب بقى


    ممممممممم
    شكلى خرجت م الموضوع خالص
    انا بفكر اخرج م البلوج قبل ما تطردنى اصل انا عندى كرامة انت عارف


    يومك فل بقى
    احسن انا مزاجى رايق
    خير اللهم اجعله خير
    يا تلحقنى يا ماتلحقنيش

    هههههههههه

    هروح امسى على اميرة بقى

    سلام

     

  • At Thursday, March 01, 2007 11:24:00 PM, Blogger Yasmine Adel Fouad said…

    عمرو

    انا تقريبا مهييسه جامد
    انا اسفه ع الرد اللى فات
    علشان قلت انى لما بشوف

    شوف هكتبه تانى
    انا شكلى قليلة الذوق بقى

    معلش
    بعتذرلك تانى يافندم
    و لو شايف الرد متخلف
    احذفه



    سورى

    ها

    ؟

     

  • At Friday, March 02, 2007 12:42:00 AM, Blogger Pragmatic said…

    بطلوا كلام بقي يا بشر واعملوا اي حاجة مفيدة
    زهقنا من كتر الكلام
    حرام عليكم

     

  • At Friday, March 02, 2007 9:04:00 AM, Blogger Utopian said…

    بنت مصر

    اي حد دايما بيكون عنده حلين
    لو حصلت حاجه مش عاجباه
    محاولة التغيير او التكيف

    الشعب المصري بأه
    مدمن تكيف

    مهما كان اللي حصل و مهما كانت الظروف

     

  • At Friday, March 02, 2007 9:07:00 AM, Blogger Utopian said…

    اميره

    لا من غير قمص و لا حاجه
    :)
    ----
    قوانين
    و رقابه

    الشعب طلباته كترت قوي
    هههههههه
    الفلكه يا جابر
    -------

    الظاهر الكمبيوتر عندك هو اللي بيهيس

    يلا بأه
    صباح الفل

     

  • At Friday, March 02, 2007 9:17:00 AM, Blogger Utopian said…

    ياسمين

    علي فكره
    في ناس كتير فعلا في مصر شايفين ان العيشه فل الفل
    مع انهم عيشتهم تصعب علي الكافر
    معرفش مقتنعين بكده ازاي
    بس فعلا في ناس كده
    في حدوته في مشوار من مشاوير خالد الخميسي كان فيها سواق تاكسي مبسوط اوي من عيشته
    و كان لسه خارج من الجيش
    و شايف ان الجيش ده مصنع الرجال
    و انه كان بياخد مرتب حلو
    و عايش فل
    لدرجة انه كان عايز يتطوع
    !!!!

    انا فعلا زهقت من الكلام
    دقت ساعة العمل
    :)


    بس انتي كده بتفتكريني طول مانتي ماشيه في الشارع بأه
    اصل شوارعنا كلها زباله
    loool

    مبروك لمصر

     

  • At Friday, March 02, 2007 9:20:00 AM, Blogger Utopian said…

    pragmatic

    حد قال حاجه هنا؟

    عندك حق
    بس انت لو قدامي كنت كنت دخلت فيك شمال

    وطي صوتك شويه يا كابتن

     

  • At Friday, March 02, 2007 6:59:00 PM, Blogger Yasmine Adel Fouad said…

    عمرو

    بخصوص الزبالة اللى فى الشارع
    فحدث و لا حرج
    على فكرة كنت عارفه انك هتدخل تقولى انى كده فاكراك على طول و هتكتب
    lol


    lol :)

    انا كمان فاكرة الراجل بتاع الجيش ده
    الكتاب ده تحفه من تحف الزمن
    تستغرب ازاى سقف وطن موجود فوق الكم المتناقض ده

     

  • At Friday, March 02, 2007 11:51:00 PM, Blogger Pragmatic said…

    ادخل شمال براحتك يا هندسة هوا انا هخاف يعني
    المهم بس بعد كل ده مجيبش فيك كمان جون

     

  • At Sunday, March 04, 2007 11:18:00 PM, Blogger saso said…

    لا اله الا الله
    للمرة التانية هاكتب التعليق
    ---
    انا شايفة التصويت مش محبط اوي يمكن علي الاقل موضوعي معاك فان موضوع المستقبل لتحت ده محبط اوي
    بس مش شايف ان عموما ده طبعنا .. بنميل للخوف من المستقبل يمكن بنميل للتشاؤوم شويتين
    يعني حتي لو متفائل يقوللك مش متاكد بس هنشوف..يا اخي قول ان شاء الله حلو
    وبعدين سد قال مفيش فايدة ..يعني اليأس ده له جذور تاريخية

    ملحوظة: لو الكومينت متحطش كالعادة هاجي تاني واحطة كبرت في دماغي بقي عندا في بلوجر

     

  • At Monday, March 05, 2007 10:37:00 AM, Blogger MAKSOFA said…

    لا للأحباط
    خليك برضه متفاءل

     

  • At Monday, March 05, 2007 11:39:00 AM, Blogger Utopian said…

    ياسمين

    عمرك اطول من عمري

    بس اناالمتناقضات دي شيء صحي و وجوده طبيعي

     

  • At Monday, March 05, 2007 11:40:00 AM, Blogger Utopian said…

    صاحبي

    كمان جون!!

    مشكلتك انك فاكر انك بتعرف تلعب كوره
    :)

     

  • At Monday, March 05, 2007 11:42:00 AM, Blogger Utopian said…

    ساسو

    معلش بأه
    عندي انا العطله دي
    امسحيها فيا

    و اللهي كويس انك متفاءله
    انا طبعا عارف اننا بنميل للتشاؤم
    ز ساعات كتير بتبفي افعانا مختلفه عن اقوالنا
    هواية جلد الذات يعني

    هحاول اتفاءل

    سلاااام

     

  • At Monday, March 05, 2007 11:43:00 AM, Blogger Utopian said…

    مكسوفه

    بحاول و اللهي

     

  • At Wednesday, March 07, 2007 12:25:00 AM, Blogger Unknown said…

    عمرو ؟؟؟؟
    خير ؟؟؟؟
    لا أسكت الله لك حساً

     

  • At Wednesday, March 07, 2007 12:54:00 AM, Blogger بنت مصر said…

    السلام عليكم
    utopian
    ازيك وايه الأخبار؟
    عندي فضول اعرف حصل تغيير في التصويت ولا كما هو؟

     

  • At Wednesday, March 07, 2007 12:55:00 AM, Blogger Utopian said…

    amira

    فيكي الخير يا اميره و اللهي
    الحمد لله
    مازلت حي أرزق

    مشغول بجد بقالي كام يوم
    علي شوية زهق كده
    بس كله بيعدي
    ربنا يسهل و انزل بوست في القريب العاجل
    ان شاء الله

     

  • At Wednesday, March 07, 2007 1:32:00 AM, Blogger Utopian said…

    بنت مصر

    الحمد لله

    عدد الاصوات زاد مره واحده
    وصل 126

    بس مفيش اختلاف كبير في النسب

     

  • At Wednesday, March 07, 2007 1:58:00 AM, Blogger بنت مصر said…

    This comment has been removed by the author.

     

  • At Wednesday, March 07, 2007 2:03:00 AM, Blogger بنت مصر said…

    مش عارفه ليه كده حسه في نبرتك بعدم الارتياح وانك مش متفاؤل
    طالما اني مؤمن بشئ افضل وراه وراه لغايه اما اسبقه كمان وايماني هو اللي هيخليني افضل وراه حتى لو نفسي اتقطع
    انت عارف انا النهاردة كنت في عز الزحمه واخدت في الطريق وقت طوييييييييييييييل جدا وكنت شايطه وفجأة كده جات عيني على حاجه بترفرف في السما وحسيت اني برفرف معاها ولقيتني ابتسمت :)
    تفتكر ايه هي الحاجه دي؟؟

     

  • At Wednesday, March 07, 2007 7:03:00 AM, Blogger Utopian said…

    بنت مصر

    مممممممم
    حاجه بترفرف في السما؟!؟!؟
    عروستي

     

  • At Wednesday, March 07, 2007 10:37:00 AM, Blogger بنت مصر said…

    السلام عليكم يا عمرو
    حاجه بترفرف في السما تكون اييييييييه؟
    علم مصر
    بجد حسيت احساس غريب و تحول تفكيري من الزحمه والتلوث للتفكير في حل المشكله من الاصل!! لا يأس مع الحياة

     

  • At Thursday, March 08, 2007 4:51:00 PM, Blogger بنت مصر said…

    السلام عليكم
    انا قرأت في مدونتك بوست عجبني اوي وتقريبا مش متداول في مدونات دخلتها ولا حتى مدونتي لأن تقريبا محدش بيزورها غيري:)
    الموضوع بعنوان"يلا ننضف بلدنا" الموضوع ده فتحلي ابواب كتيره للتخطيط والتنفيذ والموضوع مش صعب
    لو بدأت انا مثلا بالعمارة اللي ساكنه فيها واقنعت معارفي بالحمله وبدأنا بالعماره وبعدين الشارع وممكن كمان نقنع المحلات اللي حوالينا او نهددهم :) لو ماشتغلوش هنبطل نتعامل معاهم
    وممكن نفس الكلام يتنفذ في كلياتنا وحتى اماكن الشغل ليه لأ؟؟ ده لو واحد وطى شال ورقه ولا حاجه مرميه على الأرض يبقى بيشارك
    الصعوبه هتكون في تكوين فريق وممكن الناس تقول الدراسه والامتحانات ..بس المعين هو الله واللي مش فاضي دلوقتي شهرين ويفضى
    أختك المتفائله:)

     

  • At Friday, March 09, 2007 9:05:00 AM, Blogger Utopian said…

    بنت مصر

    انا بتجيلي حالات متقطعه من التفاؤل برضه و ده اللي خلاني اكتب الموضوع
    نفسي نعمل حاجه بجد
    بس ساعات كتير بحس اني بزق في حيطه

     

  • At Wednesday, April 25, 2007 1:37:00 PM, Blogger Menas said…

    بجد فكرة التصويت دى جميله اوى
    بس صدقنى فى شباب عددهم لا بأس به
    ليهم بجد اهداف وبيحاول يحققوها
    رغم كل اللى حواليهم وكل اللى بيحصل

    في مثل بيقول الضربه اللى متموتنيش تقويني

    وانا عارفه ان معظمنا محبط
    بس تعرف بجد ايه سبب الاحباط ده
    اننا بجد عندنا اهداف وبنحاول نحققها
    لكن اللى مش فارق معاه حاجه مش هيبقى محبط
    فاهم قصدى

     

Post a Comment

<< Home