الصبر حرق الدكان!!
واحد راح الدكان
عشان يشتري شوية " صبر"
أصل اللي عنده خلص من زمان
و الدكان كان فيه أخلاق ياما
أمانة ومروءة.. وشجاعة كمان
قال ياعم ياللي في الدكان
اديني بربع جنيه صبر قوام
بس الدكان كان ضلمه
فالراجل قاله استني
لما أولع شمعة
حط الشمعة جنب الشوال
بس الشمعة وقعت
و النار مسكت في الشوال
قاله ياعم الحق اديني شوية صبر
الراجل قال بعد ايه
الصبر خلاص راح
----------------
*فكره مقتبسه من مقاله
Utopian
*******************************
واللى كان كان
وقف صاحب الدكان
ولاقى كل زباينه بتوع زمان
جاى منهم الجدعان
قالوله يا عم يا بتاع الصبر
انت ياما ساعدتنا زمان
وخيرك كان على كل انسان
دلوقتى جه الوقت اللى نردلك فيه العرفان
احنا اتفقنا اننا نبنيلك الدكان
وفى اسرع فترة من الزمان
ونرجعهولك احسن مما كان
بس انت اصبر علينا
دة انت اللى بعتلنا الصبر وعلمتنا ان الصبر للجدعان
دة الصبر مفتاح الفرج ومسيرة يكون حسن الختام
((وما جزاء الاحسان الا الاحسان))
واحد صاحبي اسمه صلاح
posted by Utopian @ Thursday, January 25, 2007
30 Comments:
At Thursday, January 25, 2007 9:23:00 PM,
Anonymous said…
ربنا يرزقنا جميعا الصبر و الرضا
نصبر على حرق الدكان و خداع الزمان و اللى كان و كان
:)) جميله كالعاده
تحياتى
At Thursday, January 25, 2007 9:46:00 PM,
Anonymous said…
يا ترى الصبر بس اللي اتحرق و لا اخد معاه الاستحمال و الطناش و الفويت؟
انا لسة عندي حبة صبر ابعتلك؟؟
ابعت طبق اغرفلك فيه
At Thursday, January 25, 2007 10:18:00 PM,
Anonymous said…
دايما ستظل الجملة المعهودة
البعيرُ هلك
والله مش قدامى غير انى اصبر خصوصاً بعد كل اللى حصلى فى الكلية
مش فى إيدي حاجة غير إن اسلم أمرى لله واقول .. يارب
ربنا يستر ويصبرنا
At Friday, January 26, 2007 12:15:00 AM,
Anonymous said…
طبعا انا كنت قريت البوست بتاعك ده قبل كده يا يوتوبيان
و استغربت
بس فهمت ان صلاح صحبك كمل علية
عموما هو اكيد الراجل بتاع الصبر ده كان بيبيع حبوب شهامة كمان
لان اللى حصل مش نتيجة حبوب الصبر
عموما كويس ان لسة فيه ناس عندها شهامة
اصل دلوقتى نادرا ما تلاقيها
و شكرا ليك يا يوتوبيان
و اشكرلنا صلاح بالمرة
كريم
At Friday, January 26, 2007 2:27:00 AM,
Anonymous said…
الصبر مش هوا اللي حرق الدكان يا جماعة ده التوربينني وعصابته
بمناسبة عيد الشرطة
At Friday, January 26, 2007 7:40:00 AM,
Diyaa' said…
أنتوا مكملين بعضكوا أوي..
تعرف يا أخ يوتوبيان ( ده اللي شدني لمدونتك..كنت عامل الأسم ده زمان في الشات ..) لو الناس فهمت صح اللي بيكتبه الناس اللي بتكتب..حالنا هيتغير للأحسن..
لو الناس نفذت اللي فهمته ..أكيد هنبقي أحسن وأحسن
لو اللي أتفهم أتنفذ صح ..لو الناس أفتكرت أننا كلنا بشر والفلوس مش رايحة معانا القبر
مش هنحتاج للصبر أوي كده
بس هنحتاج للجدعنة
ممكن بقي حركة جدعنة وتبقي تديني لينك الأغنية ..( أغنية أحمد حسني دي )
بس بليز عندي في المدونة عشان مش بعرف أجيب لينكات المدونات بسهولة
سلام عليكم وتحياتي للبوست الرائع
At Friday, January 26, 2007 9:23:00 AM,
Utopian said…
big big girl...in a big big world
امين يا رب
متشكر اوي
تحياتي
:)
At Friday, January 26, 2007 9:24:00 AM,
Utopian said…
Sampateek
واللهي الصبر لما بيروح بياخد معاه كل حاجه!!
ربنا يخليكي..لسه واكل
:)
At Friday, January 26, 2007 9:25:00 AM,
Utopian said…
إنـســانة
يادي البعير اللي هلك
:)
ربنا يعوض علينا بأه
ياااااارب
At Friday, January 26, 2007 9:27:00 AM,
Utopian said…
memokareem
بالظبط كده..ومبسوط انك قريت حاجتي القديمه كمان
:)
ربنا يسهل و نبنيه من جديد
قول امين
يوصل يا باشا
At Friday, January 26, 2007 9:28:00 AM,
Utopian said…
pragmatic
أو ممكن يكون واحد مختل عقليا
وكانت بتصدر منه في الاونه الاخيره اعمال مش طبيعيه
سيبها علي الله يا عم
At Friday, January 26, 2007 9:29:00 AM,
Utopian said…
diyaa'
كلامك جميل يا ضياء واللهي
ومبسوط بزيارتك الاولي
اللينك عندك علي البلوج يا باشا
At Friday, January 26, 2007 9:31:00 AM,
Diyaa' said…
متشكرين علي الواجب ده يا باشا
هو صحيح أنت بتحلم بيوتوبيا مصرية ؟
ولا إيه النظرية ..أصلي مخدتش وقتي في البلوجر بتاعك
وقولي أنزل الأغنية ازاي بطريقة غير أني اجيبها من التيمب ..
At Friday, January 26, 2007 10:39:00 AM,
مُزمُز said…
أنا دي أول زيارة ليا ومش هتكون الأخيرة في الغالب
عندي رأي صغنون كده ياريتك تتقبله
أولا الفكرة جميلة وإن كانت فكرتني بأرض النفاق لكن العنوان مفتكس
الصبر حرق الدكان
أنا فهمته بكذا معنى ومش عارف إذا كنت فهمته غير مانت تقصد وللا إيه بس مش مشكلة المهم إنه يتحمل كذا تأويل
هو بس في نقطة مهمة جدا وهي الموسيقى
أنا شايف إن مافيش موسيقى معينة تحكم الكلمات
أنا مش معقد في الموضوع ده أنا أساسا أنتمي لشعر النثر وأنا راجل حداثوي أصلا لكن لما أقرأ عمودي أو تفعيل يبقى لازم الموسيقى تكون محكمة
على فكرة وأنا صغير لحد تالتة إعدادي كده كنت بكتب زجل وشعر أحيانا مكنتش دارس عروض بس كان بالفطرة والإحساس يعني لكن بعد كده درست عروض فسهل الموضوع كتير أوي
انت ممكن متتعمقش أوي في الموضوع لو مش عايز ولكن الحل الأسرع والأسهل دلوقتي إنك تختار تلات أربع بحور معينة وتشغل عليها الموسيقى بتاعتك دايما عشان تنقذ النص
وتحياتي
At Friday, January 26, 2007 3:03:00 PM,
Anonymous said…
هو معقولة انا لحد لنهاردة مش جيت
وكمان مش اخدت بالي من التاج اللي انت عملته
بس هو كان رايح يجيب صبر والصبر حرق الدكان
انا مش شايفة كدة
بس هو السربعه هي اللي حرقته
بس انا عن نفسي عجبتني القصيدة
عامة التاج اللي انت مررته عليا هتلاقيه عندي في البوست الجديد
At Friday, January 26, 2007 10:04:00 PM,
Anonymous said…
i like the idea it says too much .. too much to be breathed in few lines might look easy but not at all
anyway as usual i like the sentence saying
الصبر عايز صبر لوحده
يالهوى بجد دى الخلاصة
At Friday, January 26, 2007 10:46:00 PM,
Utopian said…
diyaa'
انا بحلم بيوتوبيا..ونفسي تكون مصر احسن من كده كتييييير
معتقدش ان ينفع تعمل
download
من اللينك دي
اصل الاغنيه كانت عندي و عملتلها
upload
علي اللينك دي
At Friday, January 26, 2007 10:49:00 PM,
Utopian said…
مزمز
مبسوط بزيارتك و نقدك
انا فعلا مقريتش خالص في أوزان الشعر قبل كده
و الموضوع واخده هوايه ليس الا..حتي الان :)
بس شكرا لنصيحتك جدا
سلملي علي علي :)
At Friday, January 26, 2007 10:51:00 PM,
Utopian said…
samraa
معلش بأه
نصيبه كده :)
مبسوط انها عجبتك
والتاج الدور الجاي..ماشي الكلام
At Friday, January 26, 2007 10:53:00 PM,
Utopian said…
حره
it really says too much
but it depends on the reader :)
فعلا
At Saturday, January 27, 2007 3:21:00 AM,
Diyaa' said…
وأنا معاك في يوتوبيا الخاصة بيك
والأغنية جبتها من الملفات المؤقتة بتاعة الإنترنت اكسبلورار
متشكر أوي يا باشمهندس وعايز أقول إن تصميم البلوج عاجبني أوي
At Saturday, January 27, 2007 4:28:00 AM,
Anonymous said…
هي محتاجة فعلا شوية تظبيط أوزان وموسيقى
بس المعاني جميلة
تحياتي
At Saturday, January 27, 2007 9:03:00 AM,
Utopian said…
diyaa'
مبسوط بكلامك يا ضياء
متشكر جدا
ابقي تعالي
At Saturday, January 27, 2007 9:05:00 AM,
Utopian said…
hamed ibrahim
منور و اللهي
تحياتي
At Saturday, January 27, 2007 10:51:00 AM,
Veeeva said…
وحشتني با ولد! انا خلصت امتحانات و فضيت خلاص
حلوة أوي القفلة...عايزين بوست حازيني بعد كده
At Saturday, January 27, 2007 11:23:00 AM,
Utopian said…
still B
وانتي كمان يا بنت :)
مبروك.يلا بقي افرحيلك يومين
انتي تؤمري
At Saturday, January 27, 2007 6:21:00 PM,
Anonymous said…
ايه ده كنت داخله اشوف شكل الردود بقى ايه
ايوه كده اثلجت صدرى
شكلك جيبتلى نزلة شعبية
هههههههههههه
ميرسى اوى
حاسه ان ربنا فتح عليا اهو
والدنيا وسعت شوية بدل الزنقه
ازغرد بقى
لولولولولولولولولولولولولولولولولولى
At Saturday, January 27, 2007 10:37:00 PM,
Utopian said…
ياسمين
أي خدمه
انا يهمني اريح زباين البلوج
وانتي احسن زبونه عندي
هههههههههههههههه
تصدقي كدا احسن فعلا
:)
متشكرين علي الزغروطه الحلوه دي
At Saturday, January 27, 2007 10:40:00 PM,
Anonymous said…
سلام عليك يا utopian
دي اول مرة ازور مدونتك و هي جميلة اوي ما شاء الله
البوست جميل اوي و فكرني بقصة يوسف السباعي "ارض النفاق "لما كان فيه دكان بيبيع الاخلاق ....ياااه قد ايه الواحد فعلا محتاج كام الف مليون دكان زي ده في زمانا
لكن بالرغم من قلة الدكاكين الا ان بصراحة لايزال في مصر جدعان ....
تحياتي
سلام
مها
At Saturday, January 27, 2007 11:01:00 PM,
Utopian said…
مها
سعيد بأول زياره و ارجو ان تتكرر
فعلا الفكره قريبه اوي من قصة ارض النفاق
ويا ريت اليلد تفضل..او نقول ترجع فيها الاخلاق لان الموضوع بدأ يسوء جدا
تحياتي
Post a Comment
<< Home