Tuesday, January 02, 2007

اصل الحكايه


احنا من هنا
كبرنا هنا
واتربينا هنا
وباذن رب العالمين
هنموت هنا
*******
واحنا صغيرين
قالولنا مصر دي احسن بلد
والمصري....ولد
تقدر بعلو الصوت تقول أسد
وكل حاجه في الكون
أصلا من هنا
*******
دماغي اتملت اسئله
طب ليه الاجانب شكلهم انضف مننا؟
وليه اسرائيل لسه هنا؟
وليه مدام بابا مبارك عندنا
والجيش اللي عبر من هنا
والنيل و الاهرامات ملكنا
مش عارفين ناخد حقنا
وحق جيراننا اللي جنبنا؟
*******
لكن محدش كان بيرد
ولو حد رد تسمع اجابه تخض
وتاه السؤال و الجواب
وسط الغناوي
ودوشة القهاوي
*******
وواحده واحده
الصغير كبر
والسؤال بقي عشره
و احنا بقينا...حشره
*******
ووطي صوت الغناوي
و الدش دخل القهاوي
والنت وصلت للحواري
لقينا الناس بتتكلم عننا
وعرفنا احنا مين و فين
واتسدت نفسنا
*******
والقرش
اللي كان علي الأد
بقي اقل من الأد
و مبيكفيش حد
*******
و اللقمه
هيه هيه
و العيل بقي عشره و ميه
و الدكه في الفصل بالعيال محشيه
وكله بيشرب من نفس الحنفيه
و محدش بيمسك الحراميه
*******
وبعد ده كله
تقوللي جواز و شبكه و جهاز
ياعيال ...حد يغير انبوبة البوتاجاز
*******
بس يا اسيادنا
توته توته
دي حكاية جيل اتولد
من عشرتين سنين
وكام فتفوته
*******
*******
مش الغرض نضرب الكف بالكف
و نقول أف
الغرض نعرف أصل الحكايه
من غير لف
أنا عارف ان العقد كتيره
وكل عقده فيها شنيطه
لكم لازم نبدأ بحاجه
نعمل حاجه
غير اننا نبيع و نطاطي
نبدأ حياه جديده
بطريقه جديده
نبدأ بأسره صغنطوطه
بعيد عن كلاكيع أهالينا
و نربي عيالنا بطريقه مظبوطه
كل واحد يعرف اللي ليه
واللي عليه
ويبقي عايش عشان حاجه
مش عايش و خلاص
ونبقي كلنا عارفين
اننا مع بعض في نفس المركب راكبين
لاننا اتولدنا مصريين
واللي فاكر انه لوسافر حيبقي في السليم
يبقي مش فاهم حاجه
اي حاجه
--------------------------------------------

Utopian

53 Comments:

  • At Tuesday, January 02, 2007 1:49:00 PM, Anonymous Anonymous said…

    mafeesh fayda bgad

     
  • At Tuesday, January 02, 2007 2:07:00 PM, Blogger Utopian said…

    alice

    tayeb :)

     
  • At Tuesday, January 02, 2007 3:20:00 PM, Blogger saso said…

    عارف اوقات بحس اننا جينا في توقيت الانهيار ظابطين نفسنا علية
    كان في أمل وكانت بتتصلح - ماعلينا من الانهيار الخلقي لان دة بدأ ايام السادات- بس باقي الانهيارات جت واحنا علي الارض هنا في المملكة الجديدة

    اخر سنة في الكلية - وانا طولت فيها شوية- كنت تقريبا الوحيدة من اللي اعرفهم في مصر كل الناس شايفة ان برة احسن بس انا مش ناوية امشي ،،ضايعة وحشة برضة اسمي هنا صاحب حق-مهضوم- بس صاحب الحق برة مهضوم برضة من غير حق يبقي هنا اهون،الظريف ان اغلب الناس يا رجعت يا نفسها ترجع

    عن الانهيار نفسة تحسة بدأ في السبعينات اة لكن كانت بوادر التمانينات بقي إبداع مرحلة التدجين و سفر بلاد الجاز وعلو صوت الحرفيين مقابل الموظفين والاستهلاك لمجرد الاستهلاك وبعثت لة ستة وخمسون انذارا ايام حرب ايران يعني تدجين للناس علشان تعيش وتدجين سياسي محدش عارف لية لحد النهاردة، ومصيبة التقاوي الحكومية لتدمير القمح والقطن وتنشيط زراعة الكنتلوب كمحصول استراتيجي والبيع لاجل البيع مش مهم بعت اية ولمين وبكام المهم قدام صندوق النقد نبقي متجهين للخصخصة... كل دة مش سببة حاجة واحدة زي مانت ما قلت في اكتر من عقدة واكتر من شراشيب بس المشكلة الاساسية فكرة اننا نعيش وخلاص لازم عشرين سنة جديدة علشان تعلم الناس انهم ميعيشوش وخلاص وبعدين تبقي تفكر في سياسة وتعليم ودين واقتصاد

    أنا بقيت رغاية كدة لية؟ انا كنت عاوزة اكتبلك بس ان طريقتك حلوة اوي في التعبير كتبت كل دة
    :$

     
  • At Tuesday, January 02, 2007 3:25:00 PM, Blogger Pragmatic said…

    بعيدا عن طبيعتي المتفائلة جداااا.بجد طول ما احنا عمالين نقول مافيش فايدة طول ما عمرنا ما هنعمل حاجة.
    لازم نحاول علي الاقل نكسب شرف المحاولة بس المشكلة في حاجة تانية .وهي اننا كلنا عايزين نتائج بسرعة اللي باظ في 500 سنة علي الاقل محتاج 50 علشان يتصلح
    كله يعمل اللي عليه ومينتظرش نتيجة. احنا غالبا مش هنشوفها لكن فيه ناس كتير بنحبهم وبيحبونا هيستمتعوا بيها لازم احنا نصبر علشان غيرنا يعيش
    ده لو كنا بنحب غيرنا امثال ولادنا واحفدنا وجيرنا واهلنا والناس الغريبة ديه اللي نعرفها .
    بلاش نستعجل النتائج لكن في نفس الوقت لازم نبتدي ونعرف حقيقة وضعنا ايه مش نعمل زي الجرايد ونقول كله تمام وميه ميه
    وننام علي كده. والكلام لاي حد هيقراءاللي انا كاتبه: سهل جدا انك تصلح وده عن تجربة شخصية بس الموضوع محتاج شجاعة شوية شجاعة ومقاومة للخوف اللي مزروع جواك

     
  • At Tuesday, January 02, 2007 4:26:00 PM, Blogger Utopian said…

    saso

    انتي مثقفه جدا و دي حاحه خدت بالي منها لما جيت البلوج بتاعك
    ربنا يوفقك في حياتك يا رب

    انا متفق معاكي تقريبا في كل اللي انتي كتباه.الموضوع ميتحلش في يوم و ليله...انا بعتبر جيلنا جيل انتقالي. مش احنا اللي هنعيش التغيير بس احنا اللي هنعمله بشغلنا و تربيتنا صح لولادنا

    ويا ننجح بأه يا نفشل...الاختيار لينا احنا

    ساسو...عايز اشوفك هنا كتير :)

     
  • At Tuesday, January 02, 2007 4:29:00 PM, Blogger Utopian said…

    pragmatic

    يسلم فمك يابني ...انت قلت بالظبط الافكار اللي انا شايفها ناقصه البوست ده بس لقيته هيطول اوي فقلت اسيبها للنقاش في التعليقات

    مش غريبه طبعا..ما انت حبيبي

    ربنا يسامحك بأه :)

     
  • At Tuesday, January 02, 2007 5:53:00 PM, Anonymous Anonymous said…

    pragmatic ,

    انا متفقه مع كل اللى قاله الحقيقه
    بس المشكله ان الاحباطات مش بس احباطات سلطة و لا احلام بتموت المشكله ان اللى حواليك كمان بيهبطوك سواء كبار او صغيرين و متقدرش تقول انهم غلط لكن فى نفس الوقت كلامهم هيعقد الامور أكتر

    _________________

    عجبنى اوى البوست على فكرة
    كالعادة يعنى
    بس بجد اللى عايزة أقوله
    ان احساسك بالمهانه فى أرضك متقدرش تساوية بغربتك او مهانه فى حته مش بتاعتك لان بره مهانتك ليها مبرر و مقابل و اختياريه بعض الشئ لكن مهانتك وسط ناس بتقرف و تقطم الاحلام
    بس لو الهجرة الحل يبقى البلد دى هنسيبها لمين ؟
    اصل اللى نهبوبها او بينهبوها لما ياخدوا اللى يكفيهم هيهربوا ساعتها البلد هتبقى فاضيه الا من محتليها اللى شويه و هيباونوا بشحمهم و لحمهم

    بس بجد عايزة اعرف فى حل للبلد اللى بتتباع حته حته دى و للا احنا هنفضل نتفرج
    مصيبه لا الايام تلف و نتباع احنا كمان

    مش عايزة ابان محبطة
    بس من حقى اعف اجابات لأسئلة بتخنق
    علشان لما اقول انا معاكم ابقى بقولها بنسبة ميه فى الميه مش 80 و للا 90
    علشان ساعة الجد كلنا نبقى هنا مش فى حته تانيه

     
  • At Tuesday, January 02, 2007 7:32:00 PM, Blogger Pragmatic said…

    انا حرة
    هقولك الاول علي نصيحة جامدة جدا :
    دوري علي الناس اللي تساعدك في حياتك وخليكي معاهم
    سيبك من اللي بيكسر ماقديفك علشان دول موجودين في كل مكان وكل زمان ولو كان حد من اللي خاطر علشان ينجح في حياته سمع كلام الناس ديه كنا زمننا لسه عايششين في عصر اللمبة الجاز .الحمد لله ان مفيش حد منهم سمع كلام الناس ديه
    المهم اللي عايز اقوله ان اي نجاح لازم قرار شجاح وكسر حاجز الخوف وده البداية وللاسف لما البداية تبتدي مفيش تراجع
    في بهدلة ومرمطه وكل حاجة ممكن تتخيلها هتواجهي كل حاجة حتي اهلك ونفسك لكن لازم يكون عندك الشجاعة الكافية علشان انتي عارفة ان ده الحق واي صحاب
    حق في اي مكان وزمان لازم يتحارب ويتبهدل ولازم فيه ضحايا بس المهم ان الهدف في الاخر بيتحقق وفيش مجهود بيروح سدي
    لو عندك شجاعة كافية خدي القرار وان شاء الله هتلاقي ناس كتير قوي معاكي
    قولي انا من حقي ان يكون ليا مستقبل افضل واعيش عيشة كريمة في بلد حر يعرف معني كلمة الحرية
    وعفوا علي الاطالة

     
  • At Tuesday, January 02, 2007 8:19:00 PM, Anonymous Anonymous said…

    بجد جميلة ومعبرة

    ودى فعلا حكاية كل واحد فينا

    بس الجميل إنه حاول يفهم فى وقت صعب فيه الفهم وكتر الهم والغم

    حسبنا الله ونعم الوكيل

    تحياتى
    مدونتك رائعة

     
  • At Tuesday, January 02, 2007 10:53:00 PM, Anonymous Anonymous said…

    Pragmatic ,

    انا فعلا بعمل كده يعنى مثلا فى كتاباتى بهتم برأى الناس اللى بتفهم او بتحب الكتابه و القرايه مش بسمع كلام حد اهتمامه اخرة اللون الموضه ايه مثلا
    مش القصد الاساءة لكن كل فولة و ليها كيال و كلامك مجرباه على الصعيد الشخصى اما بخصوص امور البلد فانت صح برضه المهم بس التصميم علشان العقابات مفيش اكتر منها

    ميرسى لتشجيعك و اهتمامك

     
  • At Tuesday, January 02, 2007 11:24:00 PM, Anonymous Anonymous said…

    كلامك جميل اوى وبيعبر عن جيلنا كلنا وبيعبر عنى انا بالخصوص انا كنت عايشه وخلاص بس زهقت من العيشه دى وبدأت اكتشف حاجات جديدة فى عالم المدونات اللى انا دخلته بالصدفة علشان كدة انا طلبت انى اكون صديقتك علشان اتعلم حاجات كتييييييييييير
    نانا
    وربنا يأويك على تعليمى

     
  • At Wednesday, January 03, 2007 12:47:00 AM, Anonymous Anonymous said…

    i'm not in good mood right now , fa 7adlem el blog we aswed el donia

    bs 3ndy remark mash alah enta motmken awii min adwatek we el zagl dah wala el she3r gamil gedan

    el 7ikia me7taga bs sabr we regala
    fe belad kteer kant 2a2el minana we 7althom sorry y3nu zeft bs 2amo

    we mosh 7adreb amselat china we japan we el klam dah

    bs mafesh 7ad b2a 2albo 3la el balad kolo bibos li nafso we akl 3yalo

    3ayshen bs 3lshan nakol we neshreb

    tanbla we 3awzen el bald tetsel7
    maho el sh3eb law feh nafs kan 2am 3la el embratotria el e7na 3yshen feha

    ان الله لا يغير ما بقوم حتى يغيروا ما بانفسهم

    m3rfsh el 2ayah sa7 wala la2

    we 7asbya alaho we n3em el wakel

     
  • At Wednesday, January 03, 2007 1:23:00 AM, Blogger Utopian said…

    حره

    مقدرش اقول ان عندي حل سحري لكل مشاكلنا بس الاكيد انها محتاجه صبر و رجاله
    رجاله مش ذكور
    فيه ستات بميت راجل اساسا

    pragmaticاللي فيه المفيد قال تقريبا

    اصل "Pragmatic"
    ده يبقي نصي التاني ولو تلاحظي اسمه عكس اسمي تماما
    :)

     
  • At Wednesday, January 03, 2007 1:24:00 AM, Blogger Utopian said…

    pragmatic

    نورت المحكمه يا زعيم

     
  • At Wednesday, January 03, 2007 1:25:00 AM, Blogger Utopian said…

    human

    مبسوط انها عجبتك

    احب اشوفك هنا كتير :)

     
  • At Wednesday, January 03, 2007 1:29:00 AM, Blogger Utopian said…

    نانا

    يشرفني طبعا:)

    وكويس ان الواحد يقف مع نفسه و يقيم حياته و يبدأ يغير فيها بجد

    طب ايه حكايه ال
    anaonymous di??

    لسه معملتيش بلوج؟؟
    لو عايزه اي استشاره اسألي علي طول
    تحت امرك

     
  • At Wednesday, January 03, 2007 1:34:00 AM, Blogger Utopian said…

    ma-3alina

    u r in a bad mood..w el post kaman msa3daki :)

    cheer up mesh metahla

    الايه صح علي فكره

    كل اللي افدر اقوله ان لازم نتغير فعلا
    احنا اتاخرنا اوي
    بس مينفعش نبص ورا
    وبرضه مينفعش نديها طناش

    كل اللي في ايده حاجه لازم يعملها
    واللي فاهم يحاول يفهم الناس

     
  • At Wednesday, January 03, 2007 4:34:00 AM, Anonymous Anonymous said…

    انا عايزة اعمل بلوج بس مش عارفة لسه ممكن اكتب فية ايه وهل ممكن يكون لو عملته حلو ولا لأ
    وكمان انا حسة ان فى حاجات كتير لازم اعرفها قبل ماقرر خطوة زى دى

     
  • At Wednesday, January 03, 2007 6:34:00 AM, Blogger .:.-=- ELGaZaLy-=-.:. said…

    جميلة بجد

     
  • At Wednesday, January 03, 2007 7:29:00 AM, Anonymous Anonymous said…

    دا انت حكايتك حكاية.. ايه النص العبقري ده .. بجد هايل.. برغم ان النهاية ماكانتش بنفس القوة، يمكن لأن يقينك بيها زي أي فينا مش قوي بشكل كافي، لكن بأمانة انت موهوب، واسمحلي أقولك كلمة قالهالي أبو النجوم، انت هتكون هتكون شاعر كبير، دا لو كنت عايز.. أرجووك عوز :)

     
  • At Wednesday, January 03, 2007 10:42:00 AM, Blogger Utopian said…

    anonymous

    اعمليه ..ملكيش دعوه بس و الافكار هتجيب بعضيها
    انا عن نفسي مكنتش عارف انا هعمل ايه بالبلوج اصلا يس دلوقتي اعتقد اني بقيت عارف :)

    وصدقيني مش محتاجه تعرفي حاجه يعني عشان تعمليه و كلنا بنتعلم من بعض

     
  • At Wednesday, January 03, 2007 10:43:00 AM, Blogger Utopian said…

    elgazaly

    سعيد بزيارتك جدا و مبسوط انها عجبتك

     
  • At Wednesday, January 03, 2007 10:58:00 AM, Blogger Utopian said…

    بنت الحياه

    متشكر اوي لكلامك الجميل ده و تشجيعك

    انا فعلا حاسس ان القفله مش مناسبه لان الموضوع اصلا مينفعش يتقفل :)
    فيه افكار كتير جدا ناقصه بس لقيت اني هكتب عريضه مش بوست

    بخصوص الشعر ده بأه
    انا واخده هوايه.... حتي الان
    :D

     
  • At Wednesday, January 03, 2007 12:52:00 PM, Anonymous Anonymous said…

    waooo..
    very good words utopian. fakrteny be esloob ali salama..
    well done.
    remember always en eltaree7' by3eed nafso,so law lesa leena 3omr akeed el donia hatet3'ayar 3andena we 7awlena.

     
  • At Wednesday, January 03, 2007 1:08:00 PM, Blogger Utopian said…

    white seagull

    thanks for ut nice words

    of course u r right but we shouldn't just wait to see the change..we should be a part of this change

     
  • At Wednesday, January 03, 2007 4:00:00 PM, Anonymous Anonymous said…

    اه ملاحظة موضوع الاسامى ده
    ما جمع الا اما وفق
    انتو بتكملوا بعض اهو

    انا بقى بنت الحياة و
    white seagull

    صديقات مقربين ليا
    شوفت الدنيا الصغيرة

     
  • At Wednesday, January 03, 2007 4:01:00 PM, Anonymous Anonymous said…

    زى بنت الحياة ما قالت النهايه مش بنفس القوة و فيها خلل بس موضوع مصر نسانى اقولك الملحوظة دى

     
  • At Wednesday, January 03, 2007 4:33:00 PM, Blogger Utopian said…

    حره

    دي الدنيا صغيره موووت :)

    شكرا علي النقد..فعلا عندكوا حق
    وصراحه بنت الحياه قالت سبب منطقي الي حد كبير
    أصل المشكله لما الواحد يتكلم عن الاحباطات بيبقي سهل لان المتلقي عنده نفس الاحباطات و اللي بيكتب بيقدر يلمسها بسهوله لو هو شاطر شويه
    لكن لما الواحد يبدأ ينتقل لدور حلال المشاكل بيلاقي مشكله خصوصا لو الحل مش في ايديه هو لوحده
    ولو عنده نسبة شك في جدوي الحل ده

     
  • At Wednesday, January 03, 2007 10:23:00 PM, Blogger smraa alnil said…

    دي تاني مرة ازور مدونتك
    لكن دي اول مرة اكتبلك تعليق
    كلامك معبر اوي
    بس هسالك سؤال واحد
    تفتكر في حل وامل
    بس كلامك عجبني اوي
    ومدونتك كمان
    واللي فاكر انه مسافر يبقي
    وعلي راي انا بقي
    اهو اي حاجة بقي

     
  • At Wednesday, January 03, 2007 10:31:00 PM, Anonymous Anonymous said…

    قلتلك اننا متفائله ب 2007
    و مش تسئلنى ليه
    برغم ان كل العالمات تدعو للعكس
    بس هو احساس
    البنى ادم لو مكنش قدامه امل ممكن يموت
    حتى لو مكنش الامل صادق ميه فى الميه
    بس اهه امل
    يطالما مش عارفين نغير شىء فى العالم الكبير
    نحاول فى عالمنا الصغير زى ما انت قلت
    يمكن يكونوا اولادنا هما جيل التحرير
    مين عارف
    مرسى اوى على اغنية البلوج الجميله دى

     
  • At Wednesday, January 03, 2007 10:39:00 PM, Blogger Utopian said…

    samra alnil

    نورتي البلوج و متشكر علي كلامك الجميل

    لازم يكون فيه أمل...مهو مينفعش نقفلها و نروح

    ياريت يكون فيه

     
  • At Wednesday, January 03, 2007 11:25:00 PM, Blogger Utopian said…

    big big girl...in a big big world

    التفاؤل حلو برضه
    بس حاولي تفضلي متفائله
    هو ده التحدي :)

    اي خدمه :D

     
  • At Thursday, January 04, 2007 10:03:00 AM, Anonymous Anonymous said…

    السلام عليكم بالغم من إني مختلف معاك في أخر كم 3 سطور
    بس ده مينمعش إني أقوبلك روعة الحقيقة اللي أنت كاتبه بجد بتقول حاجات الواحد عاشها بنفسه بس بأسلوب جميل
    سلام

     
  • At Thursday, January 04, 2007 10:22:00 AM, Blogger Utopian said…

    no fear

    متشكر علي الكلام الجميل ده
    و الاختلاف لا يفسد للود قضيه
    :)

     
  • At Thursday, January 04, 2007 12:24:00 PM, Blogger whyme said…

    اولاً كل سنه وانت طيب
    ثانياً شكراً ليك انك زرت مدونتى و خلتنى اعرف طريق المدونه الجميله دى
    ثالثاً انا ضحكت كتير جداً لما قريت مدونتك ...... من قبيل هم يبكى و هم يضحك
    و كمان ضحكت ضحكه اعجاب .......... اعجاب بطريقه كلامك و بطريقه اخراجك لما بداخلك فى احسن صوره و ارقى منظر و اخف دم و كأنك كسيت افكارك بلبس جميل و انيق علشان نقدر نشوفها فى احسن حال
    رابعاً اكيد انا هبقى هنا دايماً

     
  • At Thursday, January 04, 2007 2:25:00 PM, Blogger still breathing said…

    لقينا الناس بتتكلم عننا
    وعرفنا احنا مين و فين
    واتسدت نفسنا

    ignorance is a bliss afterall.

    P.S. i love ur template coz it is in my fav. color

     
  • At Thursday, January 04, 2007 2:42:00 PM, Blogger Utopian said…

    whyme

    أولا:كل سنه وانت اطيب

    ثانيا:مدونتك فعلا حلوه و منورني بجد

    ..ثالثا: مبسوط بكلامك الجميل ده
    احرجتني يا اخي

    رابعا:تنور و اللهي..البلوج بلوجك

    خامسا بأه: انا أول مره أشوف كومنت بالنظام ده :)
    الهندسه بأه..انت هتقوللي :D

     
  • At Thursday, January 04, 2007 2:48:00 PM, Blogger Utopian said…

    still breathing

    yeah..ignorance isa relief sometimes, but knowledge is a non evitable must. to know is to be

    I'm glad u like it..etfadali :)
    seebek ba2a mn el blogs shwaya 3ashan el mozakra :D

     
  • At Friday, January 05, 2007 2:24:00 AM, Anonymous Anonymous said…

    كويس أن فى ناس لسة همها على البلد وبتسأل أحنا ليه بقينا كده
    ربنا يصلح الحال
    وأدى دقنى لو أتصلحنا
    الغريب

     
  • At Friday, January 05, 2007 2:26:00 AM, Anonymous Anonymous said…

    مدونتك فعلا حلوi وجميله
    عجبني جدا تصميمها

     
  • At Friday, January 05, 2007 9:05:00 AM, Blogger smraa alnil said…

    يااااااه بجد شكرا ليك لانك ضفت مدونتي عندك
    بجد دة شرف ليا بجد
    انا كنت داخلة اشوف جديدك ايه
    بس فرحت او لما لقيت مدونتي عندك
    بشكرك

     
  • At Friday, January 05, 2007 11:07:00 AM, Blogger Utopian said…

    elgharep

    ربنا يصلح الحال ان شاه الله
    وابقي عدي يابو غريب
    :)

     
  • At Friday, January 05, 2007 11:10:00 AM, Blogger Utopian said…

    daktara

    مبسوط انها عجبتك يا دكتره

    thxx

     
  • At Friday, January 05, 2007 11:13:00 AM, Blogger Utopian said…

    smraa alnil

    شكرا ايه بس...مدونتك فعلا حلوه
    عجبتني بجد و انتي كركتر بصراحه

    مبسوط بزيارتك

     
  • At Friday, January 05, 2007 2:56:00 PM, Anonymous Anonymous said…

    و الله عندك حق
    المهم نعرف اصل الحكايه
    على فكره اسم المدونه بتاعتك عاجبنى اوى

     
  • At Friday, January 05, 2007 4:00:00 PM, Blogger Utopian said…

    و المهم بعد مانعرف اصل الحكايه منكتئبش و نعرف نحلها

    شكرا جزيلا :)

     
  • At Friday, January 05, 2007 6:03:00 PM, Blogger tamer said…

    بجد كلامك وسردك اكثر من رائع

    وجبت المتاعب كلها اللى بنعنى منها فى بوست واحد

    اتمنى ان الوضع يتغير ويكون ايجابى مش سلبى زى الان

    نحياتى

     
  • At Friday, January 05, 2007 6:45:00 PM, Blogger Utopian said…

    tamer

    متشكر علي الكلام الجميل ده

    التغيير بقي اجباري مش اختياري يا تامر

    لازم نتغير

    تحياتي:)

     
  • At Friday, January 05, 2007 11:47:00 PM, Anonymous Anonymous said…

    هههههه

    ضحكتنى لحد البكا

    اسـفـة


    بس

    صعب تعرف الإجابة .....محجتاجة قاعدة ...ولو عرفت ليه ..مش هتعرف تعمل إيه

    .........

    عجابنى

     
  • At Saturday, January 06, 2007 12:05:00 AM, Blogger Utopian said…

    noran

    للاسف هو واقعنا كده...يضحك من كتر المراره

    انا عارف ان الاجابه الي حد كبير مش اجابه
    بس بحاول الاقي اجابه
    :)

    علي فكره الناس معلقه علي الجزء الاخير ده بانه غير مقنع!!!!

    احب اشوفك هنا تاني

     
  • At Saturday, January 06, 2007 1:27:00 AM, Anonymous Anonymous said…

    امممم

    جمييل


    محدش فاهم حاجة

    اى حاجة


    غير صورة الراجل اللى نازل تخبيط فى راسه ده .., انا راسى اتوجعتله سلف

    nice blog

     
  • At Saturday, January 06, 2007 8:13:00 AM, Blogger Utopian said…

    Zordeak

    منور البلوج :)

    با عم سيبه..الدنيا مليانه بلاوي

     
  • At Tuesday, April 10, 2007 10:43:00 PM, Blogger shayma said…

    حلو جدا بجد
    ولو الفكره اتعممت هيبقى فى امل نبقى حاجه تانيه
    مكتوب حلو جدا
    سلامى ليك

     

Post a Comment

<< Home