Saturday, February 03, 2007

احنا لينا حجه في الفقر...بس ملناش حجه في النضافه

سايق العربيه علي كورنيش المعادي..
اللي هو تقريبا انضف حته في الكورنيش
قدامي عربيه لا يقل ثمنها عن 120 ألف جنيه
يعني اللي سايقها ابن ناس بالمفهوم المصري
مره واحده لقيت الشباك اتفتح و كان بيبسي اترمت
وخبطت في شبكة العربيه عندي
!!!!!!!
----------------------
واقف في اشاره
واقفه جنبي عربيه نص نقل
خخخخخخخخخخخخخخ....اتفووووو
يععععععععععععععععععععع
حاجه تقرف فعلا
---------------------
الطريق واقف
واختي راكبه جنبي
وقفت جنبي عربيه
من بتاعة زمانseat
الراجل بيقزقز لب هو و العائله الكريمه
و كويس ان اختي كانت قافله القزاز
---------------------
راكب ميكروباص
قعدت في اخر كنبه علي الشمال
و فجأه دخل شوية ستات بلدي حبتين
و انا خلاص اتزنقت للأسف
اول ما العربيه طلعت
الاستافندي (اليوسفي يعني) طلع
وقالتلي افتح القزاز اللي جنبك
بصراحه كنت فاكرها عايزه شوية هوا
بس طلعت طيب اوي
بس عشان مبقاش ناكر للجميل
الست اللي جنبي اصرت
اني لازم اخد واحده
**************************

شوارعنا مش نضيفه خالص يا جماعه
عارف ان (مش نضيفه دي كلمه غير مناسبه اصلا) .
اصلي ابن ناس الافرانكا بأه معلش

وزي ما اتعمدت في الامثله اللي فوق اني اوضح ان
الموضوع مش مرتبط بمستوي معين
الموضوع موضوع سلوكيات

الناس خايفه علي عربياتها و بيوتها و هدومها
لكن الشارع ..وايه يعني

واعتقد بأه ان الموضوع ده بالذات
ملوش دعوه بالفقر و لا بالحكومه
دي سلوكيات

و علي رأي مصطفي صديقي

احنا لينا حجه في الفقر..بس ملناش حجه في النضافه
-------------------------------
انا شايف ان الموضوع ده فعلا مهم جدا
وانا شايف ان القاهره هي اقل محافظات مصر نظافه
طبعا قصدي القاهره الكبري
مع انها واجهة مصر كلها
معادله غريبه جدا!!

نفسي كل اللي يقرا الموضوع ده
يعمل حاجه ايجابيه
احنا بنتبادل الاراء و بنتواصل
في حاجات كتير
وده مهم جدا
وفيه مدونات كتير واخده سكة التوعيه السياسيه
وناجحه الي حد كبير
بس التوعيه السلوكيه كمان مهمه جدا
والاصلاح فيها مش محتاج انتخابات
و محدش هيقلق ليتقفش!!

*******************************
Utopian

54 Comments:

  • At Saturday, February 03, 2007 1:24:00 PM, Blogger big big girl...in a big big world said…

    عندك حق و الله
    بس مش القاهره الكبرى بس
    صدقنى المحافظات كمان
    الا القليل منهم زى المدن الجديده اللى مفيهاش بشر اصلا علشان يبهدلوها

    الحل ايه
    بيتهيقلى الحل هيجى من الافراد الاول
    يعنى لما يشوفونا احنا بنضف فى الشوارع و بنحاول نخليها اموره هيتكسفوا على دمهم
    احنا عملنا حكاية حملات النضافه دى فى رساله كام مره
    النتيجه بتاعتها بتبقى كويسه جدا

     
  • At Saturday, February 03, 2007 2:12:00 PM, Blogger Utopian said…

    big big girl...in a big big world

    اكيد الحل هييجي من الافراد الاول

    رساله بصراحه بتعمل شغل محترم اوي
    واعتقد هم فعلا اللي يقدروا يغيروا لان فيها شباب كتير اوي
    و كلهم علي مستوي ثقافي محترم

    جزا الله د.شريف عبد العظيم خيرا

     
  • At Saturday, February 03, 2007 4:49:00 PM, Blogger Poussycatmiu said…

    السلام عليككم Utopian

    زمان كنا بنتعلم حاجات جميلة واحنا اطفال..يمكن مش في كل المدارس ..بس انا فاكرة شوية حاجات كدة Dont pick the flowers,, keep ur city clean

    بس لما الواحد بيلاقي ان مثله الاعلي بيكون مش كويس ..المفاهيم عنده بتتغير و المثل كمان..

    يعني لو كل واحد فينا كون حواليه دائرة بيضاء من الناس اللي فعلا نظاف هنتغير كتير..

    و واحدة واحدة كدة..و بالقول الحسن للناس اللي بترمي في الشارع هنعمل كتير
    و نفتكر دايما ان اماطة الاذي عن الطريق صدقة..


    و الحمد لله ان بلادنا مش نظيفة عشان احنا ناخد صدقات كتير..نفس منطق "" يجب ان يبقي الشعب فقيرا..فالفقراء يدخلون الجنة""

    و دايما ربنا بيدي الواحد علي اد اخلاصه و مجهوده...

    احنا كنا لما بنخرج دايما بيكون معانا شنطة بلاستيك نرمي فيها كل حاجة و بعدين نرميها في الباسكت


    عندي فكرة لو كل واحد فينا حط في العربية بتاعته الاكياس البلاستيك و يديها لاي حد بيرمي في الشارع ..
    بطريقة زوق و لطيفة

     
  • At Saturday, February 03, 2007 6:11:00 PM, Anonymous Anonymous said…

    يا ابني احنا حضارة 7 الاف سنة عين نقول اننا مش نضاف حتي ده يتناقض مع الشعور العام ان كل حاجة تمام

     
  • At Saturday, February 03, 2007 6:42:00 PM, Blogger smraa alnil said…

    بص احقاقا للحق يعني

    انا الزبالة بحطها في شنطتي اللي لما بروح بلاقيها كلها زبالة
    اشي كيس شيبسي علي كان بيبسي علي ورق مش ليه لزمة
    ولما بفضيه بلاقيهم بيقولولي طب ليه مش رمتيه في صندوق زباله في الشارع

    ببصلهم نظرة استنكارية

    انا معاك انه موضوع سلوك بس المشكلة اني مش بلاقي صنودق عشان ارمي فيه الحاجات دي

    لنفترض واحد ماشي بكان بيبسي
    وخلصوا وحب يرميه
    هيرميه فين

    بص هحكيلك علي موقف

    بعد خروجي من الكلية
    قلت اخدها مشي شوية لحد ما اركب المترو
    كان ماشي ادامي شاب ومعاه كان سفن اب دايت

    خلصها
    فضل الواد يبص يمين وشمال
    وفضل ماشي بيها لفترة طويلة
    حسيت ان هو بيدور علي مكان يرمي فيه
    وبصراحة اكتر انا زهقتلوا
    لقيته راح حاطها جنب الحيطة في الشارع ساعتها انا عديت من جنبه وبصتلوا اوي
    قالي طب اعمل ايه ما هو مش في (...........)
    زباله في ام البلد دي
    كان بيشتم يعني
    قلتله طب هاتها
    وخدتها وحطيتها في شنطتي
    راح قايلي كلمة من تلات حروف
    وقالي يعني هو انا لازم امشي بشنطة حريمي ولا كيس بلاستيك عشان احط فيه في ام الزباله دي

    يعني ممكن يكون عندنا توعية واستعداد وسلوك محترم لكن في غيرنا مش بيساعد

    عندنا في منطقتنا حاطين مقلب الزباله ادام مدرسة وكل ما الاهالي يشيلوها تيجي عربية الزباله تحطها تاني

    الناس بقت ترمي الزباله في المقلب دة وعربية الزباله يوم واتنين واسبوع وابوعين مش في حد يعرف عنها حاجة
    الناس بقي عمل ايه وهي مغلوبة علي امرها

    انا كل ما بحاول اني اتأقلم علي بلادنا كدة بلاقي اللي يخليني اغير رأيي

     
  • At Saturday, February 03, 2007 6:52:00 PM, Blogger Epitaph said…

    الاول احب اعلق ع التصويت اللي انت عامله و نتيجته اللي لغاية دلوقتي فيه ناس مترددة ان كانت لو جتلها فرصة برة البلد دي ترجع لها تاني

    و فيه ناس بنسبة كبيرة شايفة ان حال البلدفي النازل

    والنظرة التشاؤمية دي ليها علاقة بالسلوكيات كمان اللي بتقولها زي موضوع النظافة ده

    سيبك ان النظافة من الايمان و الكلام اللي حفظينه من غير لا نفهمه و لا نطبقه

    الناس بس فالحة تهاجم و تزعق و تندد و تشجب و تدين و تلعن البلد
    وهما بيتصرفوا اقذر الافعال يعني
    كفاية موضوع زبالة الشارع دي

    تفل شاي تلاقي
    ورق لب قشر يوسفي و موز تلاقي
    و انيل و اضل سبيلا

    بجد يعني
    ايه المشكلة في كيس بلاستيك معاك صغير ترمي فيه الزبالة عقبال ماربنا يفرجها و تلاقي صناديق زبالة مفتوحة و صالحة للاستعمال

    ماهو محدش يلوم الحكومة ويقول مفيش صناديف زبالة كفاية تقوم كناية في الحكومة و اللي جابوها ترمي في الشارع

    ومحدش يتكلم ع الشركة الاجنبية و الزبالة اللي فاتورتها ع النور و الكهربا و الكلام ده
    فعلا هي ليها علاقة بالسلوكيات و التربية و الاداب العامة

    معلهش ع الاطالة
    :)

     
  • At Saturday, February 03, 2007 7:00:00 PM, Blogger Noran said…

    أنت موجود هنا عشان بمصر

    عارف أنا كل يوم و أنا راجعه من الكليه بمشى شوارع طويلة ...و أكيد بأكل و أنا فى الشارع ....بدور فى الشوارع ده على علبة زبالة واحده مش بلاقى ....واحيانا برجع بيها البيت !!!ا

    المشكلة أن علب الزبالة وأنها كلها مكسورة يعنى تحط الزبالة من هنا وتقع كل الزبالة .....

    أنا فكرت أملى الشوارع الأنا بمر فيها كل يوم علب ....بس مش لاقيه حد يساعدنى !!!!!!

    تفتكر ممكن نعمل إيه ...؟؟

     
  • At Saturday, February 03, 2007 7:08:00 PM, Blogger Utopian said…

    poussy

    ِالسلام عليكم

    الموضوع فعلا حيوي و ليه حلول كتير
    طبعا مفيش حل منهم لحظي
    بس اهو الواحد بيبدأ بنفسه

    بس انا بحاول افكر في حل جديد و عملي
    بس موصلتش لسه

    احنا اتغيرنا كتير اوي عن ايام زمان يا بوسي

    زمان ده اللي هو من 10 سنين
    بجد الصفه السايده بقت الهمجيه
    و الاحباط
    و موضوع النضافه ده واحد من 100 موضوع

    و ادينا بنفكر سوا

     
  • At Saturday, February 03, 2007 7:09:00 PM, Blogger Utopian said…

    Anonymous

    ولو اني عارف انت مين

    يا بني بلاش تريقه و فكر معانا

    ما علينا
    :)

     
  • At Saturday, February 03, 2007 7:16:00 PM, Blogger Utopian said…

    samraa

    الموقف اللي حكتيه ده طبعا هو الواقع

    ومره كنت انا وواحد صاحبي وو معانا قزازة مياه فاضيه
    فضلنا ماشيين بيها كتير قوي لحد مالقينا
    باسكت
    اول ما صاحبي حطها طلعت مفتوحه من الناحيه التانيه ووقعت علي الارض
    و الناس قعدت تضحك
    و طبعا تعليقات ظريفه بقي

    بس احنا اللي عودنا الحكومه و الاحياء علي كده
    محدش بيشتكي
    عشان اتعودنا خلاص

    واللهي الموضوع محتاج ناس بتفهم و ليها وضع عشان يتسمع صوته

    يعني لو شركه زي فودافون او موبينيل
    تولت مشروع لنظافة القاهره
    هيفرق معاها في حاجه

    باسكتس في كل مكان
    و كام اعلان في الشارع
    ونجوم اف ام

     
  • At Saturday, February 03, 2007 7:23:00 PM, Blogger Utopian said…

    epitaph

    هي هي مشكلتنا يا ابي و اللهي
    ان كلامنا منفصل تماما عن الواقعيه

    وكون انه ينتقل من حيز الكلام لحيز التنفيذ بقي شيء صعب اوي

    و اضلا مفيش الامثله اللي تخلي الناس تبصلها و تعمل زيها

    شوارعنا و سخه اوي للاسف
    بجد حاجه تقرف
    والناس هيه السبب

    ايوه مفيش اماكن عشان نرمي الزباله
    عشان الناس اتعودت تعيش وسط الزباله

    و الموضوع مش محتاج فلوس خالص
    محتاج وعي بس

    وهقوللك نفس اللي قلته لسمرا


    يعني لو شركه زي فودافون او موبينيل
    تولت مشروع لنظافة القاهره
    هيفرق معاها في حاجه

    باسكتس في كل مكان
    و كام اعلان في الشارع
    ونجوم اف ام

    الموضوع فعلا سخن في دماغي
    وممكن نبدأ نعمل حاجات ايجابيه للمجتمع عن طريق المدونات
    واهي تبقي محاوله

     
  • At Saturday, February 03, 2007 7:26:00 PM, Blogger Utopian said…

    noran

    قبل ما تكون علي الزباله مكسوره
    في حاجات كتيره اوي جوه الناس مكسوره!!!!

    البني ادم بني ادم في كل حاجه واللهي

    يعني كل الناس اللي قرت الموضوع متفقه معايا
    و كل الناس بتقول انها بتحاول تحافظ من ناحيتها
    بس مش لاقيين حد يساعدهم

    طب احنا ليه مش مع بعض؟!؟!؟

     
  • At Saturday, February 03, 2007 10:10:00 PM, Blogger amira said…

    ازيك ياباشمهندس , أولا احنا كده هانقطّع على بعض لأني النهاردة .. وعلى كورنيش المعادي برضه .. خطرت في دماغي نفس الفكرة جت منين بقي؟؟ جت من سواق التاكسي علشان كان بيشتم الدنيا اللي غريبة بتمطر في يناير ومساحات التاكسي بتاعه بايظين .. حتى انا قلتله أمّا مطرة قليلة الذوق صحيح وهوه زعل مني علشان افتكرني باتريق .. المهم أنا بما اني فخورة باني ادخن قررت أولع سيجارة بعدها اكتشفت ان مافيش طفاية في الباب ولا في أي حتة يعني فيه مكانها بس متركب عليها حاجة كده بمسامير, طبعا أنا عملت زي كل مرة وطلعت منديل كلينكس وعملته قرطاس أطفي فيه وبعد ماطفيت السيجارة في المنديل برضه حطيته في الشنطة كالمعتاد وقعدت أفكر بقى في الموضوع ياترى نصلح المساحات علشان الدنيا ممكن تمطر في يوم من الأيام ولاّ نستني لمّا تمطر ونقعد نشتم في روحنا علشان ما صلحناش المساحات ؟؟؟؟ يعني .. من الواضح اننا لازم نطلع اشاعة قوية جدا ان فيه وباء بدأ ينتشر اماكن تجمع بواقي الأكل مثلا .. أو ان اسراب الذباب بدأت تهاجم البيوت بعد ما حجم القمامة زاد حاجة زي كده لأن للأسف الشعب ده مابيجيش خالص خالص بالحسنى والنصيحة لازم ترعبه بالأمراض علشان يحترم نفسه ... المهم انت عامل ايه؟؟؟

     
  • At Saturday, February 03, 2007 10:23:00 PM, Blogger Utopian said…

    amira

    تصدقي فكره حلوه فعلا
    :)

    تعلن وزارةالصحه اننا للأسف هنضطر ننضف
    !!

    مش عارف فعلا احنا ليه وصلنا كده

    قمة السلبيه مع نفسنا

    يعني مثلا اعتقد ان كل الشعب المصري مبيحبش يروح للدكاتره..وانا اولهم
    و مش بيروح غير لو كان علي ضهره
    وكله يديها ريفو و كوباية شاي و يقوم زي الحصان

    لكن يمكن برضه نقول حجه الفلوس
    بس النضافه يا بني ادمين

    اييييه..دنيا

    انا الحمد لله...يا رب تكوني بخير

     
  • At Sunday, February 04, 2007 12:01:00 AM, Blogger Ma-3lina said…

    ah walahy , ur 100% right bgd el mawdo3 dah mostfez gedan especailly lma tekon nas mot3lema we mafrod enhom min tabka 3alia

    bs mab2ash feh far2 7'las

    7ikiat el microbus di mas7'era el moehm enak tel3et be ostfandia

    walahy ma 3arfa 7al el mawdo3 dah ih ?

    aked mosh 7an3mle3lan in tv saying plz matrmosh fel shre3 3eeb walaka2enna fel karn el 18

     
  • At Sunday, February 04, 2007 12:42:00 AM, Blogger Human said…

    واضح تأثير الفكر اليوتوبي عليك المهم .....انا مش معاك ان النضافة مش كلا م في السياسة .....الناس لوعنده انتماء للمكان زي ما انا عندي انتماء لبيتي .....الإنتماء.الإحترام .محافظة على الشئ.الإحساس ان الحاجه دي بتاعتي وان ليا دور فيها .....إذن المشكلة ليست سلوكيه بحته بل يشترك فيها جانب سياسي وهو هل نشعر نحن ان هذا هو وطننا؟

     
  • At Sunday, February 04, 2007 6:08:00 AM, Blogger Utopian said…

    ma-3alina

    وليه لأ

    اذا كنا بنعمل اعلانات عن كل حاجه غير منطقيه
    جت علي النضافه

    واللهي في حلول كتير
    بس المشكله ان المصري بقي بيستمتع بخرق القانون و الاعراف

    بقت هوايه فعلا

     
  • At Sunday, February 04, 2007 6:11:00 AM, Blogger Utopian said…

    human

    و مالها يوتوبيا بس
    خلينا نحلم علي الاقل
    مش يمكن!؟

    هي كلها منفده علي بعض انا عارف

    بس انما قصدي انها مش سياسه بالمفهوم الحكومي
    عشان الناس متقلقش بس :)

     
  • At Sunday, February 04, 2007 11:31:00 AM, Blogger MAKSOFA said…

    انا باقول لو كل واحد ابتدي بنفسه وبيته واولاده المشكله ممكن تتحل

    لما زرت سويسرا اخر مره
    كنت واقفه اتكلم مع مدير الفندق اللي نزلت فيه في لوزرن و هو بيتكلم معايا لقيته فجأه وطي علي الأرض ومسك ورقه صغيره جدا لاتكاد تذكر ، وماكنش حوالينا طفايه او سله مهملات فلقيته حطها في جيب بنطلونه
    المشهد ده اثر فيه قوي

    اكيد طبعا هو حط الورقه في جيبه لحد مايلاقي سله مهملات
    وعجبني قوي سلوك الرجل واثر فيه بشكل وخلاني احس اننا فعلا شعب والعياذ بالله

     
  • At Sunday, February 04, 2007 2:22:00 PM, Blogger إنـســانة said…

    وزعلان ليه مانت خدت حتة يوستفندى
    هههههههههههه

    بص انا لما بروح البيت بلاقى الشنطة عبارة عن كيس زبالة بس شيك شوية

    فى المحاضرات بقا وطبعا ولاد الناس الكتييير اللى عندنا (قصدى ولاد السفراء) تخصص ياكوا اللى معاهم وتلاقى بعد ما المحاضرة تخلص البنشات عبارة عن بواقى ناس كانوا فى كافيتريا
    بجد حاجة تقرف
    وفعلا ملهاش دعوة بالمستوى خااااالص
    لان إبن سفير اعتقد انه حد متربى شوية يعنى

    بس الموضوع ده كسلوك ممكن يتغير
    لانى زمان كنت طالعة رحلة مع صحباتى وفتحت الشباك فى الاتوبيس وكنت عاوزة ارمى ورقة
    ساعتها صحبتى زعقتلى وقالتلى لأ ماترميهاش من الشباك
    قلتلها ليه؟
    قالتى إنتى كدة هتوسخى شوارع مصر
    طبعا ضحكت عليها ساعتها وقلت دى بتستعبط وايه يعنى لما ارمى الورقة فى الشارع

    لما كبرت بقا بطلت بس مش فاكرة الموقف اللى خلاانى ابطل بالظبط
    واى حد يرمى حاجة فى الشارع اقوله : إنت بتوسخ شوارع مصر


    مع الوقت اكتر بقا فهمت يعنى ا يه واحد اجنبى يجي مصر ويروح قرفان من قلة النضافة غير عدم احترام القوانين خصوصا المرورية

    ويعنى واحدة صحبتى مصرية اتولد وعايشة فى امريكا ومش بتحب تيجى مصر عشان عدم النضافة

    ويعنى ايه العملة الورقية المصرية من اقذر العملات الورقية على مستوى العالم
    وغيروها لمعدن عشان السياح مايقرفوش منها

    بس برده فى أمل وبالتوعية الموضوع هيفرق كتييير

    عندى إقتراح بسيط ممكن نعمل شعار او حملة كلنا نحطها فى مدوناتنا تحث على النظافة فى الشوارع وفى الحياة عموماً
    لو حد بيعرف يصمم يبقى ياريت

     
  • At Sunday, February 04, 2007 6:05:00 PM, Blogger أنـــا حـــــــــرة said…

    و الله يا عمرو هقولك
    انا مش برمى حاجه فى الارض
    مهما كانت حتى لو قشرة لب
    بحط كل حاجه فى شنطتى
    تقدر تقول ان شنطتى لما بروح بتكون مقلب زبالة
    و ده عموما
    يعنى حتى لو انا فى مكان مش نضيف مش بقول ما قذر خلقه
    و مش تربية على اد ما هى صفه شخصيه
    يعنى النضيف جوه نضيف برة
    و مينفعش اقول الشارع مش بتاعى بقى
    علشان انا مش بوسخ الشراع على اد مانا بسئ لنفسى قدامى
    يعنى يمكن انا بحسبها كده
    و اعتقد اللى علينا النصيحه
    و انك تحرج اللى قدامك بنضافتك
    يعنى انا لما بيكون معايا حد
    و يروح رامى حاجه بشيلها من ع الارض بقوله هتريمها فى باسكت و للا اشيلها فى شنطتى و ارميها انا فى ناس بتتكسف
    يعنى اعرف ناس بجد يقولولك لا مدام انا معاكى هرمى فى باسكت علشان انتى بتتضايقى
    ده مثلا حاجه كويسه
    و هقولك حاجه بصراحه
    انا اعرف ولاد و بنات كتير
    اللى بيرموا اكتر فى الشارع الولاد
    يعنى اعرف بنات كتير جدا بيشيلوا الزباله فى شنطتهم
    هتقولى بقى الولاد معهومش شنط هقولك انا مرة مشيت بكانز فى ايدى 3 ساعات لحد مالاقيت باسكت
    فمفيش حد عنده حجه

     
  • At Monday, February 05, 2007 1:00:00 AM, Blogger Pragmatic said…

    This comment has been removed by the author.

     
  • At Monday, February 05, 2007 1:09:00 AM, Blogger Pragmatic said…

    انا بحب اشوف الشوراع نظيفة وبقرف بجد لما بمشي والاقي الشارع قذر خصوصا لو كان الشارع في منطقة شعبية علشان لو ده شارع عام يمكن يكون فيه جزء من المسئولية علي المحافظة لكن الشوارع الحانبية مش من باب اولي ان كل واحد ينظف ادام بيته
    انا عايز اقدم حلي عملي لمشكلة النظافة
    اولا : يمكن معالجة الفضلات بكل اشكاله واعادة تدويرها واعتقد ان فيه مصانع في مصر ممكن تعمل كده.
    انا فكرتي في ان كل بيت يكون فيه زي مصنع صغير لمعالجة الفضلات واعادة الاستفادة منها
    مثل الورق اعادة تصنيعه مرة اخري والمكونات المعدنية
    والمكونات العضوية يمكن استخدمها في توليد الطاقة
    لو تم ذلك يمكن حل مشكلة النظافة بكل سهولة لان الناس سيترجم اهتمامه بالنظافة الي اموال وهذا ما يحتاجه هذا الشعب الفقير الذي افخر اني انتمي اليه

     
  • At Monday, February 05, 2007 7:52:00 AM, Blogger Utopian said…

    maksofa

    هي دي فعلا اكتر حاجه تزعل
    لما نشوف الناس بره في اي مكان عندهم انتماء ازاي
    واحنا للأسف!!

    وطبعا المصريين لما بيسافروا بره بيظطروا ينضفوا

    حاجه تحزن
    بس انا شايف ان الموضوع سهل بجد انه يتحل
    بس مفيش حد متبني الفكره

    يبقي ندوس احنا

     
  • At Monday, February 05, 2007 7:57:00 AM, Blogger Utopian said…

    انسانه

    عينك في الاستفندي ولا ايه :)

    طبعا الامثله اللي قولتيها بتأكد كلامنا
    ان الموضوع معتمد علي السلوك مش المستوي الاجتماعي

    بجد انا موافق اوي علي فكرتك
    انا كنت عايز اكتب كده في البوست
    بس حبيت اشوف رد فعل الناس الاول

    طيب عايزين نشوفلناحد بجد يصمملنا بوستر
    ممممممممممم

    حاجه كده زي بوستر تنظيم الاسره :)
    ونحط عليه جمله كده لذيذه و سهل تتحفظ
    بس متبقاش خنقه

    ماشي يا بني ادمه
    قصدي يا انسانه:)

    سلام

     
  • At Monday, February 05, 2007 8:02:00 AM, Blogger Utopian said…

    ياسمين

    النضيف من جوه نضيف من بره

    صعب تلاقي حد محترم بجد

    وتلاقيه..سوري يعني..معفن
    وطبعا زي ما نتي قلتي
    كل واحد فينا ليه دور فردي
    في المكان اللي بيتواجد فيه
    و الناس اللي بيتواجد معاهم

    بس احنا مع بعض علي النت
    وواضح ان كلنا بنعاني من نفس المشكله
    طب ليه منعملش حاجه سوا

    فكرة انسانه جميله و دخلت دماغي
    متعرفيشس حد فنان :)

     
  • At Monday, February 05, 2007 8:06:00 AM, Blogger Utopian said…

    pragmatic

    فكرتك طبعا حلوه

    بس انا شايف انه صعب جدا ننقل الناس من انعدام الوعي لقمة الوعي!!

    الناس دماغها في البلالا يا صاحبي

     
  • At Monday, February 05, 2007 1:09:00 PM, Blogger أخف دم said…

    أنا بيتهيألى انك بتشتم فى الرئيس يا عمنا.. أيوة أنا حاسس كده.. بتشتم ليه فى الرئيس يا باشمهندس؟ وبتقول كمان ان البلد مخروبة ؟ لاإله إلا الله..
    وكمان البلد مش نضيفه عشان الحكومة؟ يا بنى انت هتودى نفسك فى داهية كده..
    خلاص يا جماعة سامحوه باشمهندس وغلط ..

     
  • At Monday, February 05, 2007 2:32:00 PM, Blogger أنـــا حـــــــــرة said…

    وماله يا عمرو هو احنا هنكره النضافه يعنى

    انا اعرف واحده اللى عملتلى البلوج بس مش عارفه هتبقى فاضيه و للا لا

     
  • At Monday, February 05, 2007 10:51:00 PM, Blogger Utopian said…

    اشرف ابو دم خفيف :)

    ال يا قاعدين يكفيكوا شر الجايين

    ايه ياعم.. انت جاي تابسني تهمه و ماشي ولا ايه

    طب وديني لأجيب سيرتك في التحقيق

     
  • At Monday, February 05, 2007 10:53:00 PM, Blogger Utopian said…

    ياسمين

    طب شوفيهالنا كده يا ياسمين

    وانا هحاول افتكس حاجه كده

    ده عمل وطني
    مصر محتاجالكم يا ولاد

     
  • At Monday, February 05, 2007 11:27:00 PM, Blogger mano said…

    عندك حق فعلا
    و كله كوم و الناس اللى بتف فى الشارع كوم تانى
    ده غير ان اى حد معاه ورقه او كيس فاضى يرمى فى الشارع
    ساعات اقول ناس معندهاش دم
    و ساعات اقول طيب ما هم مش لاقيين حاجه يرموا فيها

     
  • At Monday, February 05, 2007 11:30:00 PM, Blogger mano said…

    نسيت اقول ان عجبنى انك بتقول ليه منعملش حاجه سوا
    فعلا عندك حق و خصوصا لما يبقى عمل جماعى

     
  • At Tuesday, February 06, 2007 3:55:00 AM, Blogger farida said…

    مش بس رمي الزباله في الشارع

    لا و تخريب المنشآت العامه
    تقطيع الكراسي في الاتوبيس او السينما
    و الكتابه على كل شيء بالحبر
    الجدران في الترام و الحمامات

    شعب قذر و يؤسفني ان اقولها

    مش فاهمه ليه كده

    و ده الحكومه ملهاش ذنب فيه
    و الله ساعات بيكون في حاجات جميله عملاها الحكومه و احنا اللي بنخربها

    النظافه من الايمان
    بس محدش نظيف خالص
    حاجه غريبه

     
  • At Tuesday, February 06, 2007 7:04:00 AM, Blogger Utopian said…

    mano

    مهو يا نسكت و نسيب اللي بايظ يبوظ اكتر

    يا اما نحاول نعمل حاجه
    اي حاجه

    سعيد بمرورك

     
  • At Tuesday, February 06, 2007 7:06:00 AM, Blogger Utopian said…

    فريده

    أكيد مش ده عيبنا الوحيد

    احنا بنعمل كوية حاجات غلط و غير منطقيه بشعه و غريبة الشكل

    مش عارف وصلنا لكده ازاي
    مع ان الاصل فل الناس الخير
    و حسن الخلق و النضافه جزء لا يتجزء من ديننا

    و المفروض اننا شعب متدين!!

    تفتكري نقدر نعدل المقلوب؟

     
  • At Tuesday, February 06, 2007 1:22:00 PM, Blogger إنـســانة said…

    إنت من الاحرار يا يوتوبيان

    فى شعار جه على بالى ساعة ما كتبت التعليق المرة اللى فاتت

    ايه رأيك نخليه زى كلمة صحبك

    احنا لينا حجة فى الفقر .. بس ملناش حجة فى النظافة

    ابقى فكر فيها
    ممممممممممممممممم

     
  • At Tuesday, February 06, 2007 2:12:00 PM, Anonymous utopian said…

    yasmine (human)

    sorry but my keyboard at work does not type arabic.

    fekra 7elwa..w heyya gat fi dema3'i fe3lan.. bass ana 3ayez el mawdoo3 yekbar bgadd w yewsal fi kol 7etta..f 7ases shwaya enno nashef awi!!

    bass howwa bennesbali akwa morasha7 :)

    bass keda na2es el logo kaman
    ya mosahel

     
  • At Tuesday, February 06, 2007 2:46:00 PM, Blogger أنـــا حـــــــــرة said…

    فكرتنى بابن عمى كان بيقول انه هيبقى رئيس جمهورية و دايما كان يقولى مصر امانه فى ايد من بعدى يا ياسمين

    ههههههههههههههه
    حاضر هشوف صاحبتى
    دى مصلحة البلد
    و مش بعيد يعملوا عننا مسلسل بقى و نتشهر

    و البليه تلعب فى ايدينا و نبنى عمارات

    قدم المشيئة بقى
    :)

     
  • At Tuesday, February 06, 2007 4:12:00 PM, Blogger Memo said…

    ياااااااااااااااااي
    لا لا لا انا لازم اعزل من البلد الي نوت كلين دي
    و بعدين الجو ملوث كمان اي ميت كاتش كولد
    او احنا نهاجر نعمل هجره جماعيه
    بس فطستني من الضحك لان كل المواقف دي بتحصل معانا كل اليوم
    ربنا يكرمك
    تحياتي
    انا بحب البلوج بتاعك موت على فكره

     
  • At Tuesday, February 06, 2007 8:07:00 PM, Blogger إنـســانة said…

    عمالة امخمخ اهوه

    ممكن نقول مثلا

    بلدنا فقيرة .. لكن نظيفة

    او
    نحو مصر نظيفة

    او
    النظافة عنوان بلدنا

    او

    يامصرى إنت المسؤل
    عن نظافة بلدك على طول

    او
    عايزين شوارع مصر نظيفة

    او
    نحو شوارع مصرية نظيفة

    او
    نظاقة الشوارع عنوانا

    او
    عايزين بلدنا حلوة نضيفة
    فى عنين العالم وعنينا


    مخمخ مخمخ ياعم الحج
    :D

     
  • At Tuesday, February 06, 2007 10:56:00 PM, Blogger Utopian said…

    حره

    يا مسهل يارب
    ان شاء الله

    لأ..بس من فضلك
    احنا عايزين نخدم البلد لوجه الله و اللهي

    بلاش نبوظ النيه من دلوقتي الله يكرمك


    شوفيهالنا كده

    ممممممم

    عايزين صورة واد واقف جنب كوم زباله و حواليه دبان...ذباب يعني
    :)
    اي حاجه تفي بالغرض
    بس تكون يتاعتنا مش حاجه من علي النت

     
  • At Tuesday, February 06, 2007 10:58:00 PM, Blogger Utopian said…

    memo

    كاتش كولد
    حاجه فعلا سوفاج خالص:)

    ربنا يخليكي يارب
    دنتي مسخره يابنتي
    يا نهار ضحك

    ابقس تعالي بقي

     
  • At Tuesday, February 06, 2007 11:04:00 PM, Blogger Utopian said…

    انسانه

    ايه عناوين الحزب الوطني دي يا ياسمين :)

    فكرتيني باعلانات البلهارسيا و تحديد النسل و ماما كريمه

    looooooool

    ممممم

    الشارع لازم ننضف فيه
    مش يمكن بكره ننام فيه

    حاجه كده يعني

    مش عارف بأه
    واللهي انا شايف ان الاولاني لسه احسن

     
  • At Tuesday, February 06, 2007 11:50:00 PM, Blogger إنـســانة said…

    فكرتيني باعلانات البلهارسيا و تحديد النسل و ماما كريمه
    هههههههههههههههههههه

    حرام عليك بقا

    يعنى انا اعصر دماغى عشان فى الاخر تطلع اعلانات بلهارسيا
    ههههههههههههههههههههههه

    تعرف بجد احلى شعار ايه؟؟؟

    البعيـــرُ هَـلكّ

    وبالتشكيل كمان
    :D

     
  • At Wednesday, February 07, 2007 7:41:00 AM, Blogger Utopian said…

    انسانه

    ده مش عشاني
    ده عشان مصر
    ههههههههه

    انا شاكك في موضوع البعير ده بأه :)

    و بالفصحي كمان

    هنلاقيها ان شاء الله

    يلا يا ولاد مصر :)

     
  • At Wednesday, February 07, 2007 4:38:00 PM, Blogger LAMIA MAHMOUD said…

    مفيش حتة في مصر تقريبا نضيفة .. قليل اوي ..بس القاهرة بقى اكتر تة بتتميز بالمعالم السياحية من اكوام الزبالة .. يعني لما تروح اسكندرية ممكن تحلف بعربتك عشان مش لاقي اكوام الزبالة

    ومع الاسف

     
  • At Wednesday, February 07, 2007 4:59:00 PM, Blogger Utopian said…

    lamia

    اسكندريه فعلا هي احلي و اجمل مثال في مصر

    و ده معناه اننا ممكن نعمل في كل مصر كده
    مهو اللي نضفوا اسكندريه دول مصريين

    الفكره بس اننا خدنا علي الوساخه..سوري يعني

    بس لازم نعمل حاجه
    اي حاجه

     
  • At Wednesday, February 07, 2007 6:40:00 PM, Blogger أنـــا حـــــــــرة said…

    حاضر يا عمرو
    و يعنى انت بتخدم مصر ببلاش و انا اللى عايزة اخد الفلوس بقى
    ماشى ياعم
    قثال ابوظ النيه قال

    و هقول لصاحبتى ان شاء الله
    بس لازم ذباذ دى بتفكرنى باعلانات زمان

     
  • At Wednesday, February 07, 2007 8:17:00 PM, Blogger Utopian said…

    ياسمين

    مش قصدي طبعا

    ربنا ينقي نوايانا جميعا ان شاء الله

    مش شرط دبان يعني :)

     
  • At Wednesday, February 14, 2007 10:20:00 PM, Blogger Poussycatmiu said…

    Salam alikom Ya Utopian Afandy


    Aih el25bar?? tamam??

    today, i saw one of my " students" elly homa amana fi r2abty hehehehehe 2al ya3ny b2eeed doktorah ad eldonia zaik...anyway i cought him throwing mandeel fil ard we aih kaman b3d ma naf feeh ,,2ah wallahy ya 3mr bgad,,i was taking the bus,, ro7t tl3teloh mn elshebaaaaaaaaak :) ,, and asked him to pick it again ,,or else he wont be allowed to attend the lab ,, i was kidding but he got me and picked it up,,i told him that next time i won't warn him,, yet i'll inform the states about the biological weapones he's just thrown..
    ra7 sa7bo 2alo """ eldoctorah betnaket ya ged3aaaaaaaaaan"""..shoft eltahzeee2,,
    just wanted to share the experiance


    regards,

     
  • At Thursday, February 15, 2007 12:03:00 AM, Blogger Utopian said…

    poussy

    wa 3alikom el salam ya poussy

    tab wallahi gada3a :)

    la tahzee2 wala 7aga. keda akeed hayfakar 2abl ma ye3melha tani

    ba3d ma naf..el m3afen :)

    Good luck ya poussy and go on

     
  • At Thursday, March 01, 2007 8:10:00 PM, Blogger بنت مصر said…

    السلام عليكم ورحمة الله
    الحقيقه انا مش قادرة اعبر الموضوع ده لفت نظري اد ايه لاني بجد مش بقدر اسيطر على نظرة الاستياء من تصرفات الناس وانا ماشيه في الشارع ولا بقدر اسيطر على حاله الارف اللي بتجيلي بس ارجع واقول الكلام ده بنقوله كتير وبنسمعه اكتر الناس دلوقتي اكتر حاجه فالحه فيها هي الاستياء والاستياء وتدور تلاقيهم بيتصرفوا تقريبا نفس التصرفات اهم حاجه الواحد يبدأ بنفسه وعائلته واصدقائه ومعارفه وحتى الناس اللي ميعرفهمش وحتى لو متقبلوش كلامه من حقي ادافع عن نظافه بلدي وكفايه اللي بنعمله في بلدنا
    انا من يومين فضلت ماشيه في الشارع بتاع 4 كيلو في ايدي كوبايه نفسي اتكعبل في صندوق مهملات علشان ارميها وواحد ماشي ادامي الله يهديه شاف علبه كانز مرميه على الارض فضل يشوطها ومصمم بجد فضل وراها لغايت اما رماها من فوق الكوبري في النيل اللي بنشرب منه قلتله حاجه تقرف والله حرام عليك النظافه من الايمان وطلعت اجري :):(
    المهم انا طولت جدا ربنا يهدي الجميع
    السلام عليكم

     
  • At Saturday, March 07, 2009 7:27:00 PM, Anonymous Anonymous said…

Post a Comment

<< Home