Quotes

الصبر حرق الدكان!!

مرة زمان

واحد راح الدكان

عشان يشتري شوية " صبر"

أصل اللي عنده خلص من زمان

و الدكان كان فيه أخلاق ياما

أمانة ومروءة.. وشجاعة كمان

قال ياعم ياللي في الدكان

اديني بربع جنيه صبر قوام

بس الدكان كان ضلمه

فالراجل قاله استني

لما أولع شمعة

حط الشمعة جنب الشوال

بس الشمعة وقعت

و النار مسكت في الشوال

قاله ياعم الحق اديني شوية صبر

الراجل قال بعد ايه

الصبر خلاص راح

وحرق معاه كل الدكان!!
----------------
*فكره مقتبسه من مقاله
Utopian
*******************************

بعد ما اتحرق الدكان

واللى كان كان

وقف صاحب الدكان

ولاقى كل زباينه بتوع زمان

جاى منهم الجدعان

قالوله يا عم يا بتاع الصبر

انت ياما ساعدتنا زمان

وخيرك كان على كل انسان

دلوقتى جه الوقت اللى نردلك فيه العرفان

احنا اتفقنا اننا نبنيلك الدكان

وفى اسرع فترة من الزمان

ونرجعهولك احسن مما كان

بس انت اصبر علينا

دة انت اللى بعتلنا الصبر وعلمتنا ان الصبر للجدعان

دة الصبر مفتاح الفرج ومسيرة يكون حسن الختام

((وما جزاء الاحسان الا الاحسان))

*********************************
واحد صاحبي اسمه صلاح

فعلا حاجه تقرف

واللهي كل مره ابقي ناوي اكتب حاجه ملهاش علاقه بالبلد و العيشه و اللي عايشينها.....بس مش بعرف

نفسي مصضوضه..عارف انها متتكتبش كده

ازاي يوصل الانحطاط الثقافي و الاخلاقي بالشعب المصري ان واحد زي سعد الصغنطط ده يبقي نجم شباك اغاني و سينما و افراح..الله لا يزيد و لايبارك

وازاي تيقي اغانيه هي العامل المشترك بين كل الافراح مهما اختلف مستواها و اماكن اقامتها، و كله يفسي دماغه و يديها رقص

لأ و اللي يغيظ بأه ان الموضوع مش موضوع ان الراجل كاريزما ولا فلته لا سمح الله. لأ ده الناس عايزه تعك و السلام، و السوق مستعد لاستفبال مزيد من العك

طب انا راضي زمتكم.. ازاي لما واحد بعرور كده يطلع يقول جملته الخالده

ابقي تعالي بالليل..وأنا أوريك الويل

الناس حتي متستغربش ان فيه كلام غريب بيتقال...وبرضه يدوها رقص

لا و يقوللك احنا مجتمع محافظ

ده احنا مجتمع حافظ

الله يكرمكم يا اخواننا

مش عارف اللي هقولوا ده اختراع ولا ايه..بس هقوله

كل واحد فينا عنده حاجه بين كتافه كده اسمها دماغ

الدماغ دي جواها مخ

والمخ ده المفروض نفكر بيه..و نشوف ايه بيعجبنا و اللي ميعجبناش منعملوش

ويبقالنا رأي بقي و كلام كبير كده

بدل ما نترمي كلنا كده في مزبلة التاريخ..وانا اولكم

الكلام ده طبعا لو لسا مفقدناش القدره علي التمييز

اصل اللي مش بيميز مش هيحس انه قاعد في مزبله اساسا

*************************************

Utopian

حاجه قديمه.. بس في وقتها

حديث

******
أيتها اللعينة...ألا تكتفين؟
ألا تتوقفين؟
كفاني
كفاني و كفاك
كفاني ما أنا فيه من ضلال
و كفاك ما أنت فيه من سواد
ألا تعودين؟
ألا تنقي نفسك و ترجعين؟
حتي نعود الي ما سلفنا..
و نحيا قانعين
لقد اعياني الاجهاد و التعب
من كثرة ما تطلبين
لطالما بهرتيني بحلو الكلام
و نسق المعاني
وأنا كالمكبل أنسي
أنسي تاريخك الأسود
من الظنون و السراب اللعين
و أمضي حتي أعود خائبا
وقد ازدادت جراحي جرحا
و أملأ الدنيا أنين

معذرة...
لقد انطلقت في حديثي كالمجنون
لم أقدم لكم من لها أهجو
و من لي و لها تسمعون
فأنا لا أتحدث الي امرأتي!!
انما اتحدث لمن هي لي أقرب!!
أتحدث الي نفسي!!

يا نفس....حتي متي؟
حتي متي نمضي حائرين؟
يا نفس توبي
توبي و ارجعي

حتي لا نحشر يوما مع القوم الضالين

**************************

Utopian

كلام مكتوب علي واجهة محل

علي رأي سعيد صالح في العيال كبرت

زاراعا...بفتكر القرايه من الاول عشان أوصل للكلمه المنيله دي

*******************************************

الصوره من عند ولاد البلد

مصر....و نظرية الشبه

مصر بلد يتمتع بكينونة خاصة بين كل دول المنطقة، بل كل دول العالم.و كذا المواطن المصري، فهو ذو طبيعة خاصة جدا جدا. قد تشعر أن هذه الكلمات هي مقدمة لخطبة مسؤل كبير، أو فا تحة برنامج تليفزيوني لكن باقي الحديث لن يكون بهذه التقليدية علي الاطلاق.....

ان ثقافة الفهلوه و حب الذات و الانانية، و قبل هذا و ذاك عدم مراقبة الله في أفعالنا قد جعلت كل شيء لدينا مشوها. فنحن نحاول أن نبني أنظمة مما ثلة لما يحدث في سائر بلاد العالم، لكننا لا نبذل قصاري جهدنا،نكتفي فقط بالشبه
ففي مصر لدينا تعليم جامعي كما هو الحال بالخارج. لكنه ليس كما يجب أن يكون.. مجرد شبه. في مصر لدينا حكومة و برلمان كما هو الحال بالخارج. لكن ليس آما يجب أن يكون.. مجرد شبه. في مصر لدينا ديموقراطيه كما تسمي كذلك بالخارج. لكن ليس كما يجب أن يكون.. مجرد شبه. في مصر لدينا ملاعب لكرة القدم، و لاعبي كرة قدم. لكن ليس كما يجب أن يكون.. مجرد شبه.
ويبقي محصلة كل ذلك، شبه مواطن و شبه دوله.....علاهما اثار التشوه
---------------------------------------------
يا مصر بحبك و بعشق ترابك....بس ترابك دخل في عيني
********************************
Utopian

اصل الحكايه

احنا من هنا
كبرنا هنا
واتربينا هنا
وباذن رب العالمين
هنموت هنا
*******
واحنا صغيرين
قالولنا مصر دي احسن بلد
والمصري....ولد
تقدر بعلو الصوت تقول أسد
وكل حاجه في الكون
أصلا من هنا
*******
دماغي اتملت اسئله
طب ليه الاجانب شكلهم انضف مننا؟
وليه اسرائيل لسه هنا؟
وليه مدام بابا مبارك عندنا
والجيش اللي عبر من هنا
والنيل و الاهرامات ملكنا
مش عارفين ناخد حقنا
وحق جيراننا اللي جنبنا؟
*******
لكن محدش كان بيرد
ولو حد رد تسمع اجابه تخض
وتاه السؤال و الجواب
وسط الغناوي
ودوشة القهاوي
*******
وواحده واحده
الصغير كبر
والسؤال بقي عشره
و احنا بقينا...حشره
*******
ووطي صوت الغناوي
و الدش دخل القهاوي
والنت وصلت للحواري
لقينا الناس بتتكلم عننا
وعرفنا احنا مين و فين
واتسدت نفسنا
*******
والقرش
اللي كان علي الأد
بقي اقل من الأد
و مبيكفيش حد
*******
و اللقمه
هيه هيه
و العيل بقي عشره و ميه
و الدكه في الفصل بالعيال محشيه
وكله بيشرب من نفس الحنفيه
و محدش بيمسك الحراميه
*******
وبعد ده كله
تقوللي جواز و شبكه و جهاز
ياعيال ...حد يغير انبوبة البوتاجاز
*******
بس يا اسيادنا
توته توته
دي حكاية جيل اتولد
من عشرتين سنين
وكام فتفوته
*******
*******
مش الغرض نضرب الكف بالكف
و نقول أف
الغرض نعرف أصل الحكايه
من غير لف
أنا عارف ان العقد كتيره
وكل عقده فيها شنيطه
لكم لازم نبدأ بحاجه
نعمل حاجه
غير اننا نبيع و نطاطي
نبدأ حياه جديده
بطريقه جديده
نبدأ بأسره صغنطوطه
بعيد عن كلاكيع أهالينا
و نربي عيالنا بطريقه مظبوطه
كل واحد يعرف اللي ليه
واللي عليه
ويبقي عايش عشان حاجه
مش عايش و خلاص
ونبقي كلنا عارفين
اننا مع بعض في نفس المركب راكبين
لاننا اتولدنا مصريين
واللي فاكر انه لوسافر حيبقي في السليم
يبقي مش فاهم حاجه
اي حاجه
--------------------------------------------
Utopian