Sunday, April 20, 2008

انت بيئه ولا ابن ناس!؟


سؤال
انت بيئه و معقد!؟
ولا ابن ناس و برضه معقد!؟
ردود أفعال غريبه أوي

سمعتها و قريتها
بعد موضوع المحافظات الجديده
حلوان و أكتوبر
بغض النظر بقي
هل ده فعلا قرار مدروس
و لا الوزرا كانوا واخدين الاصطباحه قبل اجتماع المجلس
--
مع اني ارجع الاحتمال التاني
أصل لحد دلوقتي مفيش خريطه رسميه طلعت
و بتوع الواحات معجبتهمش المنيا ودوهم اكتوبر!!!؟
--
الجميل بجد بقي رد فعل الناس الجامد
بتوع المعادي ولاد الناس
قرفانين قوي ازاي يبقوا تبع حلوان البيئه
بيقوللك احنا حي رااقي
و بتوع حلوان البيئه
فرحانين في بتوع المعادي ولاد الناس
عشان محدش يتنطط عليهم

واحده من اكتوبر اتخنقت قوي
لما
عرفت ان امبابه ممكن تكون تبع اكتوبر
قالت ازاي كده
المفروض يراعو البعد الاجتماعي في التقسيم !!
قصدها يعني امبابه بيئه واحنا ولاد ناس
نسيت ان بابا و ماما
أصلا من امبابه
وراحوا لحسوا تراب الخليج كله
لحد ما بنوا بيت في أكتوبر
!!
و االي يقول ايه ده انا بقيت أقاليم...حراام
هي أقاليم دي كلمه قبيحه!!؟
واللي خايف من اسم المحافظه في البطاقه
و اللي خايف من اسم المحافظه علي لوحة العربيه
شعب عايز بووسه ورربنا ..

انا بقي بقترح اننا نعمل محافظه
تضم كل من المناطق الجغرافيه التاليه..

بورتو مارينا و بورتو السخنه .. و أي حاجه فيها بورتو
و شرم و مرسي علم.. و كل الحتت الكوول اللي في مصر
مع مراعاة اننا نعمل كباري بينهم طبعا
عشان الناس ولاد الناس
ميضظروش يعدوا علي أي حته بيئه في السكه
و محافظه تانيه تضم كل الاماكن البيئه والناس البيئه ..
و برضه هنوصل بينهم
بأنفاق المره دي طبعا ..كوبري ايه يا بيئه!!؟
و بقترح برضه ان الحكومه تدي الحق
لكل المتضررين من
الضم لمحافظه بيئه
انه يكتب جنب العنوان في البطاقه
..بين قوسين
"ابن ناس"
عشان محدش يفهمه غلط

و الله يرحم أهالينا جميعا

!!

**********************
Utopian

11 Comments:

  • At Monday, April 21, 2008 12:48:00 AM, Anonymous Anonymous said…

    U said wat I really wanted to say ....Mota2alek fe3lan but still Complicated:)

     
  • At Monday, April 21, 2008 1:20:00 AM, Blogger Pragmatic said…

    ياعم ديه اليوتوبيا اللي قال عليها احمد خالد توفيق
    افهم بقي يا صاحبي

     
  • At Monday, April 21, 2008 1:34:00 AM, Anonymous Anonymous said…

    loool =)
    btw..some districts also have aliases...if "welad elnas" knew the real name they'd be really pissed of without getting united with other bee2a districts.
    M.M.

     
  • At Monday, April 21, 2008 6:54:00 AM, Blogger Utopian said…

    Anonymous
    thx .. Miss complicated :)

    -----------------------
    pragmatic
    بالظبط كده

    -----------------------
    M.M

    yeah..
    3ala ra2y wa7ed sa7by.. nas 3aysha
    f mayyet el batee5!!

     
  • At Monday, April 21, 2008 7:43:00 AM, Blogger samourai 4 ever said…

    هالوووووووووووووووو
    اخيرا ظهرت
    و نزلت كذا بوست
    طب مش تنبهنى يا راجل
    ابقى نبهنى بعد كدة فى الشات بوكس
    بالنسبه للبوست
    كلنا ولا تسعه
    مع انى مش عارفه معناها
    بس تهيالى عشان التواضع يعنى
    و من تواضع لله رفعه
    و بطلوا تجيبوا سيره الكتاب دة
    عشان انا كدة حتشل
    كدة انت قسمت المجتمع طبقتين بس
    طب علىف كرة فى طبقه متوسطه
    دى حتتمحى و لا ايه
    بس بوست جامد

    متختفيش كتير

    و دمتـــــــــــــــــم

     
  • At Monday, April 21, 2008 7:52:00 AM, Blogger Utopian said…

    samo..
    هااالووو

    واللهي موضوع الطبقه
    المتوسطه ده
    بقي مشكوك في امره
    !!
    كلنا لازم نختار واحده
    من الاتنين اللي قدامنا
    !!

    قولي يارب
    :)

     
  • At Monday, April 21, 2008 5:33:00 PM, Anonymous Anonymous said…

    انا مش عارفة ايه فايدة توليد المحافظات ده(القاهرة اخدوا منها ستة اكتوبر و حلوان) ،انا شايفةان هما كانوا الافضل يغيروا العاصمة والعاصمة الجديدة ديه يهتموا بيها ويطوروها ويعملوا كباري ومطارات ومدارس جديدةولا كدة كانوا هيكلفوا نفسيهم فلوس فقالوا نجيب محافظين جدد وندفع لهم من فلوس الشعب الكتيرة اللي مش عارفين يعملوا بيها حاجة (يمكن) .


    حاجة كمان ربنا يستر ومايعملوش لحلوان
    كود ونبقي كدة هنتكلم محافظات وطبعا كله علي حساب صاحب المحل اللي فلس وباع المحل (شعب المعادي).

     
  • At Monday, April 21, 2008 10:15:00 PM, Blogger mohamed said…

    اللى بيحصل ده اى حاجة فى اى بتنجان وانت عارف ان الريس بقاله كتير مخدش قرارات سياسية كبيرة واقف فى الاوف سايد على رأى محمد سعد الناس مش لاقية تاكل وهو ساكت القاهرة اتخنقت م الزحمة وهو ساكت فكان لازم يعمل اى حاجه عشان يعرفنا ان البلد ديه ليها ريس فكان القرار السياسى الحكيم من الرئيس الخالد (اه امال انت فاكر انت هتشوف غيره )

     
  • At Tuesday, April 22, 2008 7:37:00 AM, Blogger Utopian said…

    mohamed

    طويل العمر يطول عمره
    :)

     
  • At Tuesday, April 22, 2008 12:13:00 PM, Anonymous Anonymous said…

    معلش انا كنت مستعجلة جدا وكتبت اسمي غلط جدا(يخؤفخق).!!!!!!!!
    كلامك منطقي الي حد ما
    ربنا يسنر من القرارات اللي جاية

     
  • At Monday, December 01, 2008 10:24:00 PM, Blogger Muslima said…

    مش عرفة انا مع احترامى لرأيك
    هى المشكلة مش مشكلة بيئة وهاى كلاس
    بس لما تكون منطقة فى محافظة القاهرة
    والقاهرة دى العاصمة يعنى اكبر محافظة فى مصر
    تلاقيها تبع حلوان دا شى اصلا غريب
    زى بالضبط لما واحد يقول انا فى اسطنبول وواحد يقولك انا من جنوب تركيا
    ازاى تلاقى الجنوب بقى فى اسطنبول فجاه

    قرار اصلا غريب

     

Post a Comment

<< Home