مصر هي: أمك - أختك - احذف اجابتين

حاجه غريبه أوي
النهارده مشيت كتير أوي و في حتت كتير أوي
كنت مبسوط اني رايق و عايز أفكر شويه
بس أكيد المشي في الجيزه و بعدين المنيل
في ساعة الذروه يخلو أي حد يقلب وشه
نفسي أفهم...ازاي؟!؟!؟
ازاي وصلنا لدرجه الفوضي الجباره دي
نفسي أعرف الموضوع بدأ ازاي
مش كل حاجه ليها بدايه
يعني فيه بداية الكون
و بداية الحياه
و بداية السنه
و بداية الشهر
طب احنا بقي
بدأنا أسلوب الحياه ده امتي؟!؟!
.....
حاجه كمان
اللي اعرفه ان قبل الثوره
البلد كان فيها حبة بهوات و بشوات
و باقي البلد فلاحين و عمال
و محدش حيلته اللضا
و بعدين الثوره
و مجانية التعليم
و الاصلاح الزراعي
و بعدين الانفتاح
و بترول الخليج
واللي عرف يعملهم عملهم و خلصت
و اللي اتضحك عليه بالشعارات اياها
واداها قطاع عام
مقضيها تأمينات و معاشات دلوقتي

يعني كلنا عارفين اللي فيها و دافنينه سوا
نفسي أفهم بقي ايه أم التناكه و الطبقيه اللي
بقت في البلد دي؟!؟
واللهي كلنا جايين من ورا الجاموسه - و مش عيب يعني
وان مكانش احنا يبقي أهالينا
___________
بس خلاص
كام حاجه كده كانوا واقفين في زوري

Utopian