Friday, August 10, 2007

يلا ننضف بلدنا


لوانت و أهلك ورثتوا بيت ملك.. و معندكوش غيره

والبيت ده المجاري طافحه فيه، و الحيطه مدغدغه،

و الزباله مرميه في كل حته

يبقي عندكوا حل من تلاته..

يا تعيشوا فيه كده..و هتفضلوا قرفانين و مكسوفين منه

و مش طايقين تقعدوا فيه

يا تحاولو تصلحوه ايديكوا بأيدين بعض..

و بالتالي هتعيشوا فيه و انتوا مرتاحين و مبسوطين

يا تيبعوه و كل واحد يشوفلوا بيت تاني

طب ايه الحال لو البيت ده هو بلدنا!؟

فيه ناس كتير اختارت الحل الاول..

و تلاقيهم بيمارسوا هوايتهم المعتاده في تكشيرة الوش

وشتيمة البلد باللي فيها عمال علي بطال

وناس أكتر اختارت الحل التالت و سابتها مخضره

و بيجوا يشقروا علي البلد كل فين و فين

عشان يتأكدوا انها لسه مختفتش من علي الخريطه

بس ليه منجربش الحل التاني..

صدقوني ولا دول مبسوطين ولا دول مبسوطين

اتناقشنا مع بعض كتير علي المدونه قبل كده عن موضوع النضافه

و ازاي ان الناس في مصر اخر حاجه بتفكر فيها هي نضافة البلد

مع ان الناس دي تلاقيها نضيفه في مظهرها و في بيوتها

لكن الشارع مش مهم

جوا البيت مهم لكن قدام البيت مش بتاعنا

جوا العربيه مهم لكن بره العربيه مش بتاعنا

عارف ان عندنا مشاكل كتير.. والناس غلابه

بس ايه العلاقه!؟

هو الغلبان لازم يبقي معفن!!!؟؟؟

بناءا علي المناقشات الكتير اللي اتعملت علي المدونه

قبل كده.. و مناقشات تانيه بره المدونه

لقينا انه مش منطقي خالص اننا ننزل ننضف الشارع

لأنه تاني يوم هيتوسخ!!

ولازم يبقي التفكير و التطبيق كمان بمنطقيه أكتر

وكمان منتوقعش ان البلد هتنضف في يوم و ليله

لانها برضه موصلتش للي وصلته ده في يوم و ليله

لازم الناس نفسها تقتنع ان النضافه دي شيء مهم

يبقي لازم نأثر في وعي الناس بأهمية الموضوع

لينا احنا.. مش لحد تاني

قررنا نبدأ ببذره..قصدي بمكان صغير

نطبق فيه الفكره

ونشوف نتيجتها

ان شاء الله هنبدأ الحمله في كلية الهندسه-جامعة القاهره

باعتبار انه الموطن الرئيسي لمعظم المشاركين فعليا في الحمله حتي الان

يوووه...ياعم جامعة ايه بس!؟

ياعم انزل الشارع و شوف البلاوي اللي فيه

بس أنا شايف في الموضوع ميزه عاليه جدا

ان الجامعه عامة المفروض بتضم ناس ليها خلفيه

ثقافيه مرتفعه و بالتاي هيبقي التأثير فيهم بحاجه ايجابيه زي كده أسرع

و كمان.. الجامعه بتضم ناس من بيئات مختلفه

و لو نجحنا اننا نزود الوعي عند الناس دي

كل واحد هيبدأ يسوق للفكره في المكان اللي هو جاي منه

ده اللوجو النهائي للحمله


و برنامج الحمله للفتره الحاليه هيبقي كالتالي:

بوسترات تضم بعض الصور الغير المقبوله بس بقت رؤيتها

روتين يومي بالنسبه لينا، و برضه بتضم صور تانيه كويسه

لأن مجتمعنا مش كله وحش أوي كده

و هنطلب من الناس تجاوب علي شوية أسئله

و تسيب أي وسيلة اتصال بيها لو متحمسين


كاركاتيرات للتوعيه

ببعض المواقف المرفوضه

بس بنشوفها كل يوم

هنبدأ نشوف شركه لاعاده التصنيع

تبقي مسؤله عن جمع الزباله

و يبقي فيه استفاده مزدوجه

يعني الهدف في الفتره الحاليه ان احنا

نوسع القاعده المقتنعه و المتحمسه للفكره

وان شاء الله لما نبدأ نشوف مردود الكلام ده

هنبدأ ندور لرعاه للحمله-ايديكم معانا- عشان

نوصل لاماكن تانبه كتير

لأنه مش منطقي اننا نقول لحد اصرف من دلوقتي

و لسه مفيش حاجه اتعملت

طب اللي مش عندكو في الكليه و عايز يشارك يعمل ايه!؟

اللي فات كان مجرد بداية الحمله علي أرض الواقع

لكن لسه النت بقي..

فيه طرق كتيره ممكن تشاركونا بيها في المرحله دي

-لو عجبتك الفكره و عايز تشارك حط لوجو الحمله

عندك في البلوج و نوه عن الموضوع بالطريقه اللي تحبها

-اللوجو عندك أهو و البوسترات كمان.. ممكن تاخدهم و اطبع

و ابدأ انت كمان في المكان اللي انت فيه

واتصل بينا وهنحاول نساعدك

-ابعت لوجو الحمله لكل صحابك و كل الgroups

مشترك فيها

اتفقنا!؟

يلا ننضف بلدنا

Join Us

NadafaCampaign@yahoogroups.com

23 Comments:

  • At Friday, August 10, 2007 10:40:00 AM, Blogger mesh2dra said…

    السلام عليكم

    اسمحلى احييك على نشاطك

    وادعيلي اعرف اسيح لحملتك زى ما وعدتك
    دعواتك بس
    الفكرة تنجح

    سلاماتى

     
  • At Friday, August 10, 2007 4:22:00 PM, Blogger chimera said…

    هو ده الكلام :)
    ربنا يوفقنا جميعا ان شاء الله

     
  • At Saturday, August 11, 2007 3:49:00 PM, Blogger أنـــا حـــــــــرة said…

    congratulation ya amr ,

    i joined the group , i will do my best isa with posters but if there is more stuff u can suggest send me on my email ..
    i am proud of u 3la fekra

     
  • At Saturday, August 11, 2007 3:59:00 PM, Blogger أنـــا حـــــــــرة said…

    nseet a2olak od course i made new post for the group and campaign on my blog , thanx foe sharing this with us

     
  • At Saturday, August 11, 2007 3:59:00 PM, Blogger أنـــا حـــــــــرة said…

    This comment has been removed by the author.

     
  • At Saturday, August 11, 2007 5:48:00 PM, Blogger Gid-Do - جدو said…

    Utopian

    ابنى الحبيب ـ حماس وغيرةعلى مصر تشكر عليها ـ الموضوع دة ذو شقين الاول التوعية ودة انت كتبت عنه ولابد من التركيز علية ـ احنا شعب متسيب وسبب التسيب اننا مش حاسين ان مصر بلدنا دايما نقول ملك الحكومة ـ الشارع ملك الحكومة المواصلات ملك الحكومة الى اخر ده ـ وبالتالى انتقاما من الحكومة اللى قرفانا بننتقم من الشارع بتوسيخة والمواصلات بتكسيرها طالما انها مش ملكنا ـ دية نقطة التوعية لابد من تنمية الشعور بملكية البلد ودة الاساس
    -----
    الشق التانى ان احنا بندفع فلوس للمدينة اللى بنعيش فيها ـ فى صورة ضرائب او رسوم نظافة ـ لكن لانحصل على حقنا فى النظافة والحل هو المطالبة بحقنا فى هذة النظافة ـ مش من المنطق انى ادفع فلوس وتروح عليا او ادفع الفلوس واقوم انا بالشغل
    ------
    ركز يابشمهندس على التوعية وطالب انت وزملائك مجلس المدينة بالقيام بواجبة
    ------
    وانا عن نفسى وكل اللى اقدر علية انى اشير الى حملتك فى مدونتى فى بوسط لوحدة ـ كان الله فى عونك فى بلد فقد ناسها روح التعاون وبقى كل واحد يقول يااله نفسى ـ تحياتى

     
  • At Saturday, August 11, 2007 7:15:00 PM, Blogger Utopian said…

    mesh2adra

    W 3alikom el salam

    thanks..um not alone anyway

    do ur best fel tasyeeeee7

    salam

     
  • At Saturday, August 11, 2007 7:16:00 PM, Blogger Utopian said…

    chimera

    yeah :)

    the logo looks great..thx

     
  • At Saturday, August 11, 2007 7:17:00 PM, Blogger Utopian said…

    yasmine

    i checked the post..howwa da el kalam

    Do ur best in advertising for now, but sure i'll keep u informed

    Salam :)

     
  • At Saturday, August 11, 2007 7:19:00 PM, Blogger Utopian said…

    giddo

    thanks a lot Grandpa for your motivating us by voming here..

    We'll do our best isa

     
  • At Saturday, August 11, 2007 8:12:00 PM, Blogger smraa alnil said…

    اي نعم انا بترحم علي سعد زغلول دلوقتي
    بس هبقي معاكو

    علي فكرة يا عمور

    انت رحت لمدونة شيماء شيكو وواضح انك مش تعرف
    انت كتبت عندها الف سلامة عليكي وبتطلب منها انها تكون قوية ومؤمنة

    واللي عايزة اقولهولك انها توفت

     
  • At Saturday, August 11, 2007 8:34:00 PM, Blogger Utopian said…

    samra

    yeah, I knew from ur post and I commented again..

    I was really shocked..
    Al baqa2 lellah
    rabbena yer7amha w yod3ha el janna b2zen allah

    thx engy

     
  • At Sunday, August 12, 2007 12:36:00 PM, Blogger saso said…

    حاضر
    :)
    هاحط البانر.. بس اقرا حبه عن التفاصيل

    و... باحييك

     
  • At Tuesday, August 14, 2007 4:51:00 PM, Blogger عمرو فكرى said…

    معاك يا باشمهندس

    انا حطيت اعلان عندى

     
  • At Tuesday, August 14, 2007 8:10:00 PM, Blogger Utopian said…

    saso

    mashi el kalam :)

    merciii

     
  • At Tuesday, August 14, 2007 8:12:00 PM, Blogger Utopian said…

    Amr Fekry

    howwa da el kalam ya 3amoor

    meyya meyya

     
  • At Thursday, August 16, 2007 12:19:00 PM, Blogger إنـســانـة said…

    يتوبيان

    اولا انا اسفة جدا لانى اتأخرت فى تلبية الدعوة

    ثانيا انا معااااك قلبا وقالبا لأن بجد بوستاتك القديمة بتاعة النضافة لحد دلوقتى لما اشوف مشهد اى كلام افتكر البوست وبتاعك ومناقشتنا فيه

    ربنا يكرمك يارب ويجعله فى ميزان حسناتك وفى ميزان حسنات كل مشارك فى الحملة

    ويارب حلمنا وهدفنا يتحققوا

    اللهم اميييييين

     
  • At Friday, August 17, 2007 10:07:00 PM, Anonymous Anonymous said…

    انا معاكو ياجماعة انا بحب مصر جدا وبدايق اوى من اللى بيحصل فيها دا
    صحيح انا معنديش مدونة بس هحاول انى اعرف كل صحابى واهلى بالحملة دى وهما كمان يقولو لغيرهم عشان مصرنا حبيبتنا ام الدنيا تبقى اجمل واحلى ام فالدنيا
    توتا......

     
  • At Friday, August 17, 2007 11:06:00 PM, Blogger Utopian said…

    insana

    7amdella 3ala el salam..wala yhemek
    bass hemmetek m3ana ba2a

    try to do whatever you can

     
  • At Friday, August 17, 2007 11:07:00 PM, Blogger Utopian said…

    tota

    that's nice..
    try to add something then

    good luck for us all

     
  • At Tuesday, August 21, 2007 1:29:00 AM, Blogger farida said…

    أولا آسفه جدا جدا على التأخير

    أحييك بشده على ايجابيتك و مجهودك
    انت عارف اني معاك طبعا
    ححاول على قد ماقدر
    و حضيف اللوجو عندي.
    و اشوف موضوع الاستيكرات

    بحييك بشده
    و بحترمك اكتر

     
  • At Tuesday, August 21, 2007 7:20:00 AM, Blogger Utopian said…

    Farida

    thx for ur support

    hope it's useful isa

     
  • At Saturday, December 12, 2009 12:43:00 AM, Anonymous Anonymous said…

    signed to your rss

     

Post a Comment

<< Home