Thursday, January 17, 2008

قصاقيص


من تلات أربع تيام
كنت داخل انام
نص ساعه.. ساعه .. اتنين
مفيش !!
فيه حاجه مش تمام
قمت فتحت النور و عملت كباية شاي
وقعدت اخد و ادي مع نفسي في الكلام
والكلام خدنا
والليل سرح

والصبح طلع

بس برضه معرفتش
كانت عايزه مني ايه!؟
---------------------
---------------------
تعرفوا نفسي في ايه!؟
نفسي في أي حاجه تانيه تفرحنا
غير ان الأهلي يروح اليابان
وان أبو تريكه و متعب يجيبوا شوية اجوان
!!!!
---------------------
---------------------
غمض عينك
افتح بقك
اقف علي رجل واحده
حط ايدك في الكيس الاسود
اللي مش باين ايه جواه ده
متخافش
أيوه كده
واللهي لوسمعت الكلام يبقي تستاهل كل اللي يجرالك :)
---------------------
---------------------
الصوره ملهاش علاقه بأي حاجه
بس فكرتني بأيام ما كنت بحط التراب في الطاقيه
!!

Utopian

15 Comments:

  • At Thursday, January 17, 2008 2:18:00 PM, Blogger ساعد نسرين الايمن said…

    برافو عليك
    حقيقي الله ع الصورة والموضوع

    بس ع فكرة وليد حارس المرمي اللي في الصورة مكينش بيلعب مع كابتن ماجد كان بيلعب ضده

    ع العموم حصل خير

     
  • At Thursday, January 17, 2008 3:11:00 PM, Blogger Utopian said…

    لأ ما هو ده بأه فريق الاحلام

    حصل خير

    منور أو منوره و اللهي
    :)

     
  • At Thursday, January 17, 2008 10:32:00 PM, Blogger Pragmatic said…

    ياعم انت ايه الاقتباس ده
    انا فاهم ليه حتيطة الصورة بس مش هقول ادام الناس

    طبعا برضه انا فاهم ايه موضوع حاجة تانية تفرحنا غير ابو تريكة خصوصا اني انا اللي قولتلك يومها ايه اللي حصل

    يا صاحبي ادخل نام وريح

     
  • At Thursday, January 17, 2008 10:54:00 PM, Blogger Utopian said…

    ما شاء الله عليك
    فاهم كل حاجه
    ايه يا واد الحلاوه دي
    نفسك معانا في الدنيا يا صاحبي
    قشطه عليك

     
  • At Friday, January 18, 2008 1:31:00 AM, Blogger Pragmatic said…

    ياعم ده اقل واجب هوا احنا لينا غير بعض يا فندم

     
  • At Friday, January 18, 2008 4:14:00 PM, Anonymous Anonymous said…

    mmm...7aga tefara7na !?
    guess Happiness is in every corner, we just need to look for it.(ya3ni lazem net3ab shuwayetein)
    maybe then it wont b about elAhly..

    it's been long since ur last post,welcome back =)
    M.M

     
  • At Sunday, January 20, 2008 2:51:00 AM, Blogger Pragmatic said…

    طبعا طبعا يا عمور لازم تبص للسعادة اللي متنطوره في كل حته

    بس عمرو والله اعلم مش قصده كده

    قصده ان اكبر امل للمواطن المصري ان الاهلي ياخد الدوري السنة ديه وياسلام لو اخد الكاس
    وابوتريكة يلعب كل المتشات بلياقة عالية


    مفيش امل في بكرة بكره ده رعب لكل الناس
    علشان كده بتهرب منه باي وسيلة
    وارخص وسيلة واسهل حاجة الكورة

    الانسان بطبيعته عايز قضية يدافع عنها

    اعتقد صعب ان حد من الناس اللي ماشية جوه الحيط يتبني اي قضية

    فاسهل حاجة طبعا يتبني قضية الاهلي ويدافع عتها بكل وسيلة كانها بيدافع عن الاقصي بالضبط

    ده باختصار الواقع المرير اللي احنا عايشينه
    نفسي يوم اصحي اقراء خبر يفرح في الجرايد غير اخبار الرياضة

    نفسي اشوف مرة نشرة فيها حاجة غير ان المسلمين والعرب ياخدوا بالجزمة

    غالبا ممكن وانا بحلم المهم بس اتغطي كويس

    وربنا يستر وياريت يا عمور متلغيش الكومنت ده لاني فعلا برد علي نفسي مش برد والله علي حد تاني

    وشكرا

     
  • At Sunday, January 20, 2008 3:07:00 AM, Blogger Pragmatic said…

    تكملة للموضوع

    انا للاسف من الجيل اللي شاف كل خيبة ممكنة لينا

    من اول انتفاضة الاقصي الي احتلال العراق مرورا بغزو الكويت وكل اللي قلبك يحبه

    بس انا فيه يومين فاكرهم ومش قادر انساهم

    يوم 11 سبتمبر

    مش هقول اللي حصل الامريكا ايه ديه حاجة الناس كلها عارفها

    يومها كل الناس في مصر كانت فرحانة فعلا
    لدرجة اننا كنا بنكلم اي حد في الشارع ونقوله شوفت اللي حصل الامريكا
    ونلاقي الناس تكلمنا شوفتوا اللي حصل لامريكا

    فرحة عمري ما حسيتها
    الا في اوقات نادرة جدا
    بيظهر جزء من الفرحة المكتومة ديه لما بنكسب ماتش كورة

    ويوم سقوط بغداد

    يومها حسيت وانا بتفرج علي التلفزيون ان حد اداني علي قفايا

    وقاعد يضحك واللي يغيظك اكتر انك متقدرش تقول حاجة ولا تفتح بوقك بكلمة

    كاننا في لعبة كمبيوتر والجاهز اداك جيم اوفر

    تفتكر بعد كل ده هنلاقي منين حاجة تانية تفرحنا

    الواحد بس مش عارف يقول ايه ولا ايه

    اللي فعلا عايز بيدور علي السعادة

    يعيش عيشة تانية ويغير اسمه وهويته
    ويسافر
    هنا مفيش سعادة هنا مفيش امل

    اللي يقبل انه عايز يعيش هنا لازم يقبل بالقواعد ديه

    وانا مش هقدر الوم اللي سافر واو اللي قاعد
    الاثنين صعبانين عليا
    الاول باع ارضه والتاني باع ارضه برضه

    وياويل اللي يبيع ارضه في مقابل امل في سلام كاذب

    الحاجة الوحيدة اللي تقدر تعملها انك تشتغل علشان توفر لاحفادك السعادة اللي انت عايزها لنفسك

     
  • At Sunday, January 20, 2008 9:22:00 PM, Blogger Utopian said…

    يعني هو انا اسيب البلوج يومين
    اجي الاقيك بتردم عليه يا جدع انت
    !!!!

    مش هرد لانه مينفعش
    هو فعلا فيه حاجات كتير تفرح
    بس متفرحش أي حد
    !!

    -----
    لحاجة الوحيدة اللي تقدر تعملها انك تشتغل علشان توفر لاحفادك السعادة اللي انت عايزها لنفسك

    -----

    ربنا يسامحك يا أخي
    :)

     
  • At Sunday, January 20, 2008 10:27:00 PM, Blogger Sarah El Said Mohamed said…

    zaman kanet kol far7ety enny ashof kartoonatak de
    delwa2ty wala 7ayata leman tonady..!

    nefsena nefra7 far7etna belkartoon zamaaaaaaaaaaan.......
    bas law gat elfar7a de fi elwa2t da tefteker han7ess beiha zay zaman ?
    ya3ny moshkelty ya seedy enny
    bas2al,
    elmoshkela fi enena nefra7 walla feena e7na enena mesh
    3arfeen nefra7 ......?
    de kol 7aga.........salam

     
  • At Tuesday, January 22, 2008 9:30:00 PM, Anonymous Anonymous said…

    ايام ما كنت بحط التراب في الطاقية
    ياه اد ايه نفسي ارجع للايام ديه

    لما كبرت شوفت الدنيا وعرفتها وياريتني ما شوفتها ولا عرفتها

    حاولت افهمها ما فهمتها
    يوم حلو وعشرة مر
    وساعات اليوم الحلو يتلكك وما يجيش
    يالا الحمدلله يارب رحمتك

    معلش انا لسه خارجة من امتحانات وحاجات كتير
    معلش لو خنقتكم
    ربنا يوفق الجميع
    ويرزقهم ويرزقني ضحكة صافية من القلب

     
  • At Tuesday, January 22, 2008 11:33:00 PM, Blogger Known as PHYSCO said…

    ما بلاش تفكير كتير علشان تعرف تنام

    و الصورة رجعتنى لأيام زمان لما كنت باتفرج على كابتن ماجد فى السعودية

     
  • At Thursday, January 24, 2008 4:12:00 PM, Blogger Utopian said…

    عاشقة الحريه

    فرحة الكرتون دي صعبه أوي
    هنجيبها منين دلوقتي
    دلوقتي مش بعرف أتفرج علي كرتون خالص
    بس نفسي فعلا أوصل للشعور ده دلوقتي
    فرحة الفرجه علي الكرتون :)
    بس مش عارف
    ---------------------------------
    doctor

    ولا يهمك
    ادينا بنفضفض
    ---------------------------------
    بيقولوا سايكوا

    مش كده برضه
    طب سلام عشان عاوز أنام
    :)

     
  • At Friday, February 15, 2008 8:22:00 PM, Blogger Yasmine Adel Fouad said…

    ياااااه يا عمرو

    كابتن ماجد ؟
    أيام زمان فكرتنى ، كنت بتحط التراب فى الطاقيه و بعدين ؟


    بس فين أيام حتة الجبنة يا عمرو ؟
    انت اتحسدت ؟
    عايز تفرح .. اخلق افراحك
    صدقنى هتقدر
    لو عايز

     
  • At Tuesday, February 19, 2008 1:19:00 PM, Blogger Utopian said…

    عمري ما كنت عايز دي دلوقتي
    i will isa
    thx yasmine

     

Post a Comment

<< Home