يلا ننضف بلدنا

لوانت و أهلك ورثتوا بيت ملك.. و معندكوش غيره

والبيت ده المجاري طافحه فيه، و الحيطه مدغدغه،

و الزباله مرميه في كل حته

يبقي عندكوا حل من تلاته..

يا تعيشوا فيه كده..و هتفضلوا قرفانين و مكسوفين منه

و مش طايقين تقعدوا فيه

يا تحاولو تصلحوه ايديكوا بأيدين بعض..

و بالتالي هتعيشوا فيه و انتوا مرتاحين و مبسوطين

يا تيبعوه و كل واحد يشوفلوا بيت تاني

طب ايه الحال لو البيت ده هو بلدنا!؟

فيه ناس كتير اختارت الحل الاول..

و تلاقيهم بيمارسوا هوايتهم المعتاده في تكشيرة الوش

وشتيمة البلد باللي فيها عمال علي بطال

وناس أكتر اختارت الحل التالت و سابتها مخضره

و بيجوا يشقروا علي البلد كل فين و فين

عشان يتأكدوا انها لسه مختفتش من علي الخريطه

بس ليه منجربش الحل التاني..

صدقوني ولا دول مبسوطين ولا دول مبسوطين

اتناقشنا مع بعض كتير علي المدونه قبل كده عن موضوع النضافه

و ازاي ان الناس في مصر اخر حاجه بتفكر فيها هي نضافة البلد

مع ان الناس دي تلاقيها نضيفه في مظهرها و في بيوتها

لكن الشارع مش مهم

جوا البيت مهم لكن قدام البيت مش بتاعنا

جوا العربيه مهم لكن بره العربيه مش بتاعنا

عارف ان عندنا مشاكل كتير.. والناس غلابه

بس ايه العلاقه!؟

هو الغلبان لازم يبقي معفن!!!؟؟؟

بناءا علي المناقشات الكتير اللي اتعملت علي المدونه

قبل كده.. و مناقشات تانيه بره المدونه

لقينا انه مش منطقي خالص اننا ننزل ننضف الشارع

لأنه تاني يوم هيتوسخ!!

ولازم يبقي التفكير و التطبيق كمان بمنطقيه أكتر

وكمان منتوقعش ان البلد هتنضف في يوم و ليله

لانها برضه موصلتش للي وصلته ده في يوم و ليله

لازم الناس نفسها تقتنع ان النضافه دي شيء مهم

يبقي لازم نأثر في وعي الناس بأهمية الموضوع

لينا احنا.. مش لحد تاني

قررنا نبدأ ببذره..قصدي بمكان صغير

نطبق فيه الفكره

ونشوف نتيجتها

ان شاء الله هنبدأ الحمله في كلية الهندسه-جامعة القاهره

باعتبار انه الموطن الرئيسي لمعظم المشاركين فعليا في الحمله حتي الان

يوووه...ياعم جامعة ايه بس!؟

ياعم انزل الشارع و شوف البلاوي اللي فيه

بس أنا شايف في الموضوع ميزه عاليه جدا

ان الجامعه عامة المفروض بتضم ناس ليها خلفيه

ثقافيه مرتفعه و بالتاي هيبقي التأثير فيهم بحاجه ايجابيه زي كده أسرع

و كمان.. الجامعه بتضم ناس من بيئات مختلفه

و لو نجحنا اننا نزود الوعي عند الناس دي

كل واحد هيبدأ يسوق للفكره في المكان اللي هو جاي منه

ده اللوجو النهائي للحمله

و برنامج الحمله للفتره الحاليه هيبقي كالتالي:

بوسترات تضم بعض الصور الغير المقبوله بس بقت رؤيتها

روتين يومي بالنسبه لينا، و برضه بتضم صور تانيه كويسه

لأن مجتمعنا مش كله وحش أوي كده

و هنطلب من الناس تجاوب علي شوية أسئله

و تسيب أي وسيلة اتصال بيها لو متحمسين

كاركاتيرات للتوعيه

ببعض المواقف المرفوضه

بس بنشوفها كل يوم

هنبدأ نشوف شركه لاعاده التصنيع

تبقي مسؤله عن جمع الزباله

و يبقي فيه استفاده مزدوجه

يعني الهدف في الفتره الحاليه ان احنا

نوسع القاعده المقتنعه و المتحمسه للفكره

وان شاء الله لما نبدأ نشوف مردود الكلام ده

هنبدأ ندور لرعاه للحمله-ايديكم معانا- عشان

نوصل لاماكن تانبه كتير

لأنه مش منطقي اننا نقول لحد اصرف من دلوقتي

و لسه مفيش حاجه اتعملت

طب اللي مش عندكو في الكليه و عايز يشارك يعمل ايه!؟

اللي فات كان مجرد بداية الحمله علي أرض الواقع

لكن لسه النت بقي..

فيه طرق كتيره ممكن تشاركونا بيها في المرحله دي

-لو عجبتك الفكره و عايز تشارك حط لوجو الحمله

عندك في البلوج و نوه عن الموضوع بالطريقه اللي تحبها

-اللوجو عندك أهو و البوسترات كمان.. ممكن تاخدهم و اطبع

و ابدأ انت كمان في المكان اللي انت فيه

واتصل بينا وهنحاول نساعدك

-ابعت لوجو الحمله لكل صحابك و كل الgroups

مشترك فيها

اتفقنا!؟

يلا ننضف بلدنا

Join Us

NadafaCampaign@yahoogroups.com