كل سنة و احنا احسن كتير من كده

احنا مش طيبين...بلاش نضحك علي نفسنا

علي الاقل خلونا طموحين شوية و احنا بنعيد علي بعض

ده الكلام مش بفلوس

حاجة كمان...يا ريت نحاول نحب البلد بجد

الناس بقت بتتعامل مع البلد أكنها مأجرة شقة ايجار جديد

الواحد يقعد يكسر و يوسخ و يبوظ

ما هي مش فرقه بأه...كلها شوية و العقد يخلص

ويروح يشوفله بلد تانيه...قصدي شقه تانية

يا ريت نعتبر مصر شقه تمليك مش ايجار الله يكرمكم

يا رب كل سنة جاية نبقي احنا و بلدنا أحسن بكتير من السنة اللي قبلها

---------------------------------------------------

Utopian

قصاقيص قديمة - 3

السعودية في بطولة الأمم الأفريقية!!!!

لست ممن يهوون جلد الذات و النظر دائما للعيوب و التغاضي عن المحاسن، فأنا أحب مصر كثيرا... أحب وطني كثيرا...خاصة عندما يتعلق الأمر بصورتنا أمام الاخرين.
كنت هناك...واحد ضمن الاف من المصريين الذين حضروا افتتاح كأس الأمم الأفريقية الخامسة و العشرين لكرة القدم باستاد القاهرة

يوم 20 يناير 2006. احتفالية جميلة..جو صاخب..فرحة تكسو الوجوه..فمن حق هذا الشعب أن يسترق بعض لحظات السعادة و الفرحة.
احتفال بسيط و جيد بالرغم من اعتراضي علي استهلاكنا السىء لتاريخنا الفرعوني و اهمال حقبات تاريخية أخري كانت أكبر و أعظم تأثيرا في حياتنا. استاد القاهرة أصبح في غاية الجمال. مجهود كبير قد بذل..ولكن كعادة المصريين دائما، واضح أنه مجهود اللحظات الأخيرة.
في احدي فقرات الحفل تم عرض أعلام الدول المشاركة في البطولة علي شاشتي الاستاد العملاقتين الحديثتين الباهظتين....ولكن!!
نظرت الي الشاشة فرأيت شيئا عجيبا! لم أصدق عيني فاستعنت بمن يجلس جواري. أليس هذا علم المملكة العربية السعودية؟! لم يجب عن سوءالي، ولكن قال:"يا نهار اسود". هو بالفعل نهارا أسودا، فما الذي جاء به الي هنا؟!
من في مصر لا يعرف علم السعودية؟ و من في مصر لا يعرف أن السعودية لا تقع معنا في نفس القارة؟ دعونا من كل ذلك.. بافتراض أن هذا الشخص المسوءل عن هذا الخطأ "هندي" بلغتنا الدارجة..ألا يوجد تحضير و اشراف أم أن كل واحد "ماشي بدماغه"؟!! أحمد الله ان هذه الفضيحة لم تنقل عبر شاشات التليفزيون و اقتصرت فقط علي من حضروا الحفل داخل الاستاد.
يبقي السؤال..لماذا وصلنا لهذه الدرجة من التخبط في كل شىء؟
انه تراكم لسنوات طويلة من العك..و اسناد المهام و الوظائف للمعارف و أصحاب الوسايط قليلي المهارة و الخبرة، في حين أن أبناء مصر و أصحاب المواهب الحقيقية هم بكل أسي و فخر قائدي مسيرة التقدم في كل دول العالم....... عدا مصر!!!

"اللهم ولي أمورنا خيارنا"

--------------------------------------------------------------------

Utopian

قصاقيص قديمة - 2

جثث .....بحالة جيدة!!!

هو اسم فيلم بوسني يشترك في مهرجان القاهرة السينمائي الدولي هذا العام. هو فيلم من أفلام الكوميديا السوداء الذي يصف الحالة التي يعيشها الشعب البوسني بعد الحرب الشهيرة التي انتهت منذ ما يقرب من عشرة أعوام أو يزيد قليلا.
دعونا لا نخوض في أحداث الفيلم بقدر اهتمامنا بهذا الاسم الذي يشد الانتباه منذ الوهلة الأولي، (جثث.... بحالة جيدة!!).أعتقد أن هذا الوصف لا يمت بأي شكل من الأشكال بحال الشعب المصري.......مع ان مافيش حرب و لا نيلة.

--------------------------------------------------------------------

Utopian

قصاقيص قديمة - 1

سر عدم انقراض المواطن المصري!!!

ينقرض الكائن الحي عندما لا تتوافر له الظروف المناسبة لتكوينه الفسيولوجي أو اذا تعرض لحملات من الابادة بغرض الاستفادة من هذا الكائن بصورة أو بأخري. كلام منطقى....مش كدة؟
فما هو سر عدم انقراض المواطن المصري حتي الان؟!

-----------------------------------------------------------------------

Utopian

يا صابر الصبر صبرني بصبر عبادك الصابرين

من السهل علي الانسان ان يقلد صوت الحمار ، لكن من الصعب أن يكون له القدرة علي التحمل و الصبر

سعيد صالح و سهير البابلي و هما بيخنقوا علي بعض في مدرسة المشاغبين

Utopian

يوم في الخلاط

كتبت هذا الشيء بعد قضاء 6 ساعات في الشارع، هي الفترة التي قضيتها (في هذا اليوم التاريخي) في رحلة الذهاب و الاياب من العمل، و التي تستغرق عادة في الحالات الطبيعية ساعتين تقريبا ...مع العلم ان كان معايا عربيه

----------------------------------------------------------------------

واالهي منا عارف

ابدأ كلامي منين

بس الاكيد اني بحبك

اصلي من صلبك

مختارتكيش

بس أنا عارف

ان غيرك مليش

ولو لساني خاني

و قلت كلام مش هو

متصدقيش

اسمعي الكلام بأه

متخنقينيش!!

حطي نفسك مطرحي

بنزل من بيتنا الصبح

واخد دش

و مظبط

ناوي اعيش يوم مثالي

شغل بضمير

و لسان نضيف

و ابتسامه علي الوش

بس للاسف..مبتطولش!

أوصل الشغل تعبان

ببأه عايز أنام!!

أصلي خدت كام نفس

من كام مليون شكمان

ده غير اني وصلت متأخر

لمجرد ان فيه 70 مليون

عيل من عيالك

سايبين

الخريطة المرحرحة

و قاعدين

علي حجر بعض

و فاهمين

انهم حيروحوا الشغل

مش متأخرين!

جعت و تعبت و صدعت

و لسه حقضي كام ساعة

مع كام بني ادم

مروا بنفس التجربة!!

و فجأه يتحول هدف كل البني ادمين

ان اليوم يعدي و خلاص

عشان يروحوا يناموا ساعتين!

ارجع بيتنا

و علي وشي

غضب الله

اغسل وشي

الميه تتعكر

شفتي اليوم السكر؟!

اكل و انام

و اقوم

افتح التليفزيون

اتفرج علي كل الناس

اللي انا بكرههم

و بشتم فيهم كل يوم

و ارجع اتفرج عليهم تاني يوم!!

و كده خلص اليوم

و اروح اديها نوم

استعدادا ليوم جديد في الخلاط...........!!!

Utopian

مصر...... ممكن لحظه

مصر...... ممكن لحظه
عايز اتكلم معاكى كلمتين
مش هعطلك هما كلمتين
بس ياريت المره دى تسمعينى
يمكن دى اخر مره تشوفينى
مستغربه؟! انا قلت اكيد فهمتى!!
شفتى؟! شكلك فهمتى
بالظبط .... خلاص
هسيبك
بجد مش هينفع نكمل سوا..... زهقت

من ايه؟!
اسف.... ضحكت... وسكت
مش عشان مش عارف ليه
لأ... ده عشان مش عارف أبدأ بايه
خلاص خلاص.... انا هقولك ليه
بس ياترى أبدأ بايه
اه
بصى يا ستى

زهقت من القناه الاولى والتانيه
والاهرام والاخبار والجمهوريه

زهقت من مسلسل سبعه ونص وحديث الروح
وطنطاوى ونشرة تسعه

زهقت من درجات المستوى الرفيع
والثانويه العامه وكليات القمه

زهقت من السواقه والحلاقه وشرا اللبس
وعمرو دياب واحمد السقا

زهقت من حرية الصحافه وحرية الراى
وحرية المواطن..... بس متفرحش أوى

زهقت من ارض الكنانه والحضاره والفراعنه
والسبع تلاف سنه

زهقت من تشجيع السياحه وشرم الشيخ والغردقه
والاجنبى بيجى يحط رجله فى وش أتخن تخين فينا

زهقت من 6 اكتوبر
وبدور وابناء الصمت والرصاصه مازالت فى جيبى

زهقت من عيد العمال
والسيد راشد وعاش الملك مات الملك

زهقت من مجلس الشعب
وسرور والشاذلى وعزمى.... ودايما موافق يا شعبى

زهقت من الوطنى وبابا مبارك و ماما سوزي
وجيمى و علاء.....عقبال حماده الصغير

زهقت من اشارة المرور والوقوف في الطابور
وعمر الاشارة مبتفتح و لا الطابور بيخلص

زهقت من الجواز و الجهاز و أنبوبة البوتاجاز
والكل قاعد مستني ابن الحلال..بس مش أي ابن حلال!!!

ايه بتعيطى؟!
....................
طب استني......لسة مخلصتش
لسه كمان حاجه واحده زهقت منها
تحبى تعرفيها؟!

زهقت من كل مره قلتلك فيها الكلمتين دول
واول ماشوفك بتعيطى
ارجع احن..... واترمى فى حضنك

!!!!!!خلاص...... مش هسيبك!!!!

Utopian

تخاريف قبل النوم

هي مش مصر أمنا ؟

طب بزمتكم فيه عيال يقعدوا يشتموا في أمهم كده ليل نهار؟

أما عيال زبالة صحيح

معلش ياما

بس برضه الحق عليكي

أصلك معرفتيش تربي

................

اه صحيح

ماما ماما

هو بابا فين؟؟

ما علينا

أنا داخل أنام

..........

وانتي من أهله

Utopian