Tuesday, March 07, 2006

مصر...... ممكن لحظه

مصر...... ممكن لحظه
عايز اتكلم معاكى كلمتين
مش هعطلك هما كلمتين
بس ياريت المره دى تسمعينى
يمكن دى اخر مره تشوفينى
مستغربه؟! انا قلت اكيد فهمتى!!
شفتى؟! شكلك فهمتى
بالظبط .... خلاص
هسيبك
بجد مش هينفع نكمل سوا..... زهقت
ايه؟!من ايه؟!
اسف.... ضحكت... وسكت
مش عشان مش عارف ليه
لأ... ده عشان مش عارف أبدأ بايه
خلاص خلاص.... انا هقولك ليه
بس ياترى أبدأ بايه
اه
بصى يا ستى
زهقت من القناه الاولى والتانيه
والاهرام والاخبار والجمهوريه

زهقت من مسلسل سبعه ونص وحديث الروح
وطنطاوى ونشرة تسعه

زهقت من درجات المستوى الرفيع
والثانويه العامه وكليات القمه

زهقت من السواقه والحلاقه وشرا اللبس
وعمرو دياب واحمد السقا

زهقت من حرية الصحافه وحرية الراى
وحرية المواطن..... بس متفرحش أوى

زهقت من ارض الكنانه والحضاره والفراعنه
والسبع تلاف سنه

زهقت من تشجيع السياحه وشرم الشيخ والغردقه
والاجنبى بيجى يحط رجله فى وش أتخن تخين فينا

زهقت من 6 اكتوبر
وبدور وابناء الصمت والرصاصه مازالت فى جيبى

زهقت من عيد العمال
والسيد راشد وعاش الملك مات الملك

زهقت من مجلس الشعب
وسرور والشاذلى وعزمى.... ودايما موافق يا شعبى

زهقت من الوطنى وبابا مبارك و ماما سوزي
وجيمى و علاء.....عقبال حماده الصغير

زهقت من اشارة المرور والوقوف في الطابور
وعمر الاشارة مبتفتح و لا الطابور بيخلص

زهقت من الجواز و الجهاز و أنبوبة البوتاجاز
والكل قاعد مستني ابن الحلال..بس مش أي ابن حلال!!!

ايه بتعيطى؟!
أيوة بتعيطي
طب استني......لسة مخلصتش
لسه كمان حاجه واحده زهقت منها
تحبى تعرفيها؟!

زهقت من كل مره قلتلك فيها الكلمتين دول
واول ماشوفك بتعيطى
ارجع احن..... واترمى فى حضنك
خلاص...... مش هسيبك!!!!
Utopian

posted by Utopian @ Tuesday, March 07, 2006  

1 Comments:

  • At Monday, March 20, 2006 7:32:00 AM, Anonymous Anonymous said…

    although i didnt get fed up from all these things, maybe um not experienced that much but that is exatly the feeling, maybe we can work to make others not go through all this too, maybe when we "ne7en" we can work with her.

     

Post a Comment

<< Home